Իլհամ Ալիև. Ադրբեջանն ու Հայաստանը արդեն հարմարվել են խաղաղ կյանքին, Ադրբեջանը կշարունակի իր ջանքերը խաղաղության օրակարգի առաջխաղացման համար
Ադրբեջանն ու Հայաստանը արդեն հարմարվել են խաղաղ կյանքին, Ադրբեջանը կշարունակի իր ջանքերը խաղաղության օրակարգի առաջխաղացման համար,- հայտարարել է Ադրբեջանի նախագահ Իլհամ Ալիևը Եվրոպական խորհրդի նախագահ Անտոնիո Կոստայի և Եվրոպական հանձնաժողովի նախագահ Ուրսուլա ֆոն դեր Լեյենի հետ հանդիպման ժամանակ։
Իլհամ Ալիևի խոսքով՝ խաղաղության օրակարգի հետ կապված նվաճումները պատմական նշանակություն ունեն ամբողջ տարածաշրջանի, այդ թվում՝ Հայաստանի և Ադրբեջանի համար։
Հանդիպման ժամանակ Անտոնիո Կոստան և Ուրսուլա ֆոն դեր Լեյենը շնորհավորել են Ալիևին Վաշինգտոնում Հայաստանի և Ադրբեջանի միջև խաղաղության օրակարգի շուրջ ձեռք բերված հաջողությունների համար և հույս հայտնել, որ դա կնպաստի տարածաշրջանում կայուն խաղաղության ապահովմանը։
Նրանք նաև նշել են, որ տարածաշրջանում տրանսպորտային կապերի զարգացումը կարևոր առաջնահերթություն է Եվրամիության համար։