Հունգարիայի վետոյի պայմաններում Լվովում կայացած ԵՄ ընդհանուր հարցերի խորհրդի նիստի ժամանակ նախարարները համաձայնության են եկել Ուկրաինայի եվրաինտեգրման տեխնիկական գործընթացի նոր ձևաչափի շուրջ։ Այս մասին մամուլի ասուլիսում հայտարարել է Դանիայի Եվրոպական հարցերով նախարար Մարի Բիերեն։

«Կա մի երկիր՝ Հունգարիան, որը դեռևս արգելափակում է բանակցությունների պաշտոնական բացումը։ Մենք այս պահին այդ բլոկադայի վերացումը չկարողացանք։ Սակայն մենք ընտրել ենք այլ մոտեցում, ինչը նշանակում է, որ այժմ մենք ուժեղացնում ենք ամբողջ տեխնիկական աշխատանքը։ Թեև պաշտոնապես գործընթացը դեռ արգելափակված է, Ուկրաինան կարող է առաջ շարժվել տեխնիկական փուլերով», – նշել է Բիերեն։

Նրա խոսքով՝ Եվրամիությունում շատերի համար հիասթափեցնող է այն փաստը, որ հնարավոր չեղավ սկսել անդամակցության բանակցությունների առաջին փուլի բացումը Ուկրաինայի հետ, սակայն նոր մոտեցումը նշանակում է, որ Ուկրաինայի վերաբերյալ ընդլայնման գործընթացը չի դադարեցվել։

Իր հերթին, ԵՄ-ի ընդլայնման հարցերով հանձնակատար Մարտա Կոսման հայտարարել է, որ երեկ Ուկրաինայի կառավարության հետ համաձայնեցվել է բարեփոխումների գործողությունների ծրագիր, որը ներառում է տասը առաջնահերթություն։ Դրանք կենտրոնացած են իրավունքի գերակայության ուժեղացման, կոռուպցիայի դեմ պայքարի և ուժեղ, հաշվետու ժողովրդավարական ինստիտուտների կառուցման վրա։

«Ուկրաինայի ապագան ԵՄ-ում է։ Այսօր տեսնում ենք, որ անդամ պետությունները հստակ սահմանել են ուղղությունը։ Գրեթե բոլորը ընդգծել են, որ այս գործընթացը պետք է շարունակվի՝ որպես կառուցվածքային և կանխատեսելի գործընթացի մաս։

Անդամ պետությունները մեզ ցուցումներ են տվել, թե որ բարեփոխումների արդյունքներն են նրանք ակնկալում Ուկրաինայից, որպեսզի գործընթացը առաջ շարժվի։ Բարեփոխումները այս գործընթացի առանցքում են, և ոչ ոք չի կարող վետո դնել Ուկրաինայի կողմից դրանց իրականացման վրա», – նշել է Կոսման։