Հնդկաստանի զինված ուժերը Քաշմիրում իրականացնում են որոնողական գործողություններ, իսկ տարածաշրջանում անվտանգության միջոցառումները խստացվել են
Հնդկաստանի զինված ուժերը Քաշմիրում իրականացնում են որոնողական գործողություններ, իսկ տարածաշրջանում ուժեղացված են անվտանգության միջոցառումները։ Այս մասին հայտնում է «Ռոյթերս»-ը։
Մեդիայի տեղեկացմամբ՝ Քաշմիր է ժամանել զինված ուժերի հրամանատարը և այցելել է հարձակման վայրը։ Հնդկաստանի վարչապետ Նարենդրա Մոդին խոստացել է, որ մեղավորները կպատժվեն։
Բացի այդ, Հնդկաստանը հորդորել է Պակիստանի քաղաքացիներին լքել երկիրը մինչև ապրիլի 29-ը։ Հնդկաստանի կառավարությունը նաև դադարեցրել է 1960 թվականին ստորագրված ջրային ռեսուրսների վերաբերյալ համաձայնագրի գործողությունը։ Ի պատասխան՝ Պակիստանը հայտարարել է, որ եթե Հնդկաստանը դադարեցնի ջրի մատակարարումը, դա կհամարի «պատերազմի ակտ»։
Մեդիայի փոխանցմամբ՝ անցած գիշեր հրաձգություն է եղել Հնդկաստանի և Պակիստանի սահմանի՝ վերահսկողության գծի երկայնքով, սակայն միջադեպի արդյունքում զոհեր չեն գրանցվել։
Հիշեցնենք, որ ապրիլի 22-ին Քաշմիրի շրջանում, Հնդկաստանի վերահսկողության տակ գտնվող տարածքում, տեղի է ունեցել հարձակում զբոսաշրջիկների վրա, որի հետևանքով զոհվել է 26 մարդ։ Հարձակման պատասխանատվությունը ստանձնել է «Քաշմիրի դիմադրության ճակատ» խմբավորումը։ Հնդկաստանը պնդում է, որ այս խմբավորումը ստանում է Պակիստանի աջակցությունը, սակայն Իսլամաբադը կապը հարձակման հետ հերքում է։