ԱՄՆ նախագահ Ջո Բայդենը Հայաստանի վարչապետ Նիկոլ Փաշինյանին ուղղված նամակում խոստացել է ամրապնդել համագործակցությունը Հայաստանի հետ անվտանգության ոլորտում, հայտնում են հայկական լրատվամիջոցները։

Ըստ լրատվամիջոցի՝ ԱՄՆ նախագահի նամակը Նիկոլ Փաշինյանին է փոխանցել այսօր Երեւանում գտնվող ԱՄՆ Միջազգային զարգացման գործակալության ղեկավար Սամանթա Փաուերը։

«Ես խնդրել եմ Սամանթա Փաուերին՝ մեր կաբինետի ամենակարևոր անդամներից մեկին, անձամբ հաստատել ձեզ Միացյալ Նահանգների և իմ վարչակազմի ամուր աջակցությունը Հայաստանի կայուն տարածաշրջանային խաղաղության ձգտման գործում՝ երաշխավորելով Հայաստանի ինքնիշխանությունը, անկախությունը, տարածքային ամբողջականությունը և ժողովրդավարությունը»,- ասված է նամակում։

Բայդենի խոսքով, Հայաստանի կառավարությունը մասնակցել է Ադրբեջանի հետ խաղաղ բանակցություններին, ինչպես նաև իրականացրել է կարևոր տնտեսական բարեփոխումներ, բարելավել կառավարության հաշվետվողականությունը և ամրապնդել ժողովրդավարական ինստիտուտները։

«Վստահեցնում եմ ձեզ, որ Միացյալ Նահանգները կշարունակի աջակցել Հայաստանին երկրի ներսում ժողովրդավարության ամրապնդման և ձեր հարևանությամբ կայունություն հաստատելու ջանքերում։ Մենք կշարունակենք նաև ամրապնդել մեր համագործակցությունը էներգետիկ դիվերսիֆիկացման, դիմակայունության և անվտանգության ոլորտում, ինչը ցույց տվեցին Հայաստանում անցկացված զորավարժությունները»,- ասված է նամակում։