Ֆրանսիան Իրանի հետ շատ հարցերում համաձայն չէ, բայց Հայաստանի հարցում միաձայնություն կա, այս մասին հայտարարել է Հայաստանում Ֆրանսիայի դեսպան Օլիվյե Դեկոտինին։

Ֆրանսիացի դիվանագետի խոսքով՝ Ֆրանսիան մտածում է ոչ թե ազդեցության ոլորտների մասին, այլ յուրաքանչյուր պետության՝ իր ինքնիշխանությունն ու տարածքային ամբողջականությունը պաշտպանելու իրավունքի մասին։

«Ինչ վերաբերում է Ադրբեջանի մտահոգություններին, ապա նրանք կարող են վստահ լինել, որ համագործակցության տեսակը, տեխնիկայի տեսակները, որ մենք տրամադրում ենք Հայաստանին, ուղղված են երկրի պաշտպանությանը, դրանք միայն պաշտպանական բնույթ են կրում։ Ի դեպ, երբ խոսում ենք հակաօդային պաշտպանության մասին, եթե չխախտես Հայաստանի օդային տարածքը, երբեք չես հանդիպի Հայաստանի ՀՕՊ-ին, սա պաշտպանական ներուժ է։ Մենք խոսում ենք Հայաստանի, նրա տարածքի և ժողովրդի ինքնիշխանության պաշտպանության մասին, և ի սկզբանե պարզ էր, որ այն ամենը, ինչ մենք տրամադրում ենք՝ զենք, տեխնիկա, ուսուցում, համահունչ է այս նպատակին»,- ասել է Օլիվյե Դեկոտինին։