Հայաստանն ու Եվրամիությունը այսօր Բրյուսելում կստորագրեն ռազմավարական գործընկերության նոր օրակարգ։ Հայկական լրատվամիջոցների փոխանցմամբ, այս մասին հայ լրագրողների հետ հանդիպման ժամանակ հայտարարել է ԵՄ ընդլայնման հարցերով հանձնակատար Մարթա Կոսման։

Կոսմայի խոսքով, գործընկերության նոր օրակարգը կստորագրեն ՀՀ արտաքին գործերի նախարար արարատ Միրզոյանը և ԵՄ արտաքին գործերի և անվտանգության քաղաքականության հարցերով բարձր ներկայացուցիչ Կայա Կալասը։

«Կկայանա ԵՄ-ՀՀ խորհրդի նիստ, որի ժամանակ կընդունվի ՀՀ-ի և ԵՄ-ի միջև ռազմավարական գործընկերության նոր օրակարգ։ Սա կլինի գործողությունների ծրագիր, ճանապարհային քարտեզ այն մասին, թե ինչ կարող ենք անել», – ասել է Մարթա Կոսման։

Նրա խոսքով, նոր օրակարգը կներառի օգնություն, որը կաջակցի ՀՀ տնտեսական զարգացմանը և ինստիտուտների ամրապնդմանը։ ՀՀ-ԵՄ ռազմավարական գործընկերության օրակարգը ներառում է նաև համագործակցություն պաշտպանության և անվտանգության ոլորտում։

Ինչպես նշել է Մարթա Կոսը, ԵՄ-ն կաջակցի ՀՀ-ին առաջիկա խորհրդարանական ընտրություններից առաջ հնարավոր հիբրիդային սպառնալիքների, ապատեղեկատվության և կիբեռհարձակումների դեմ պայքարում։ Այս նպատակով ԵՄ-ն ՀՀ-ին կհատկացնի 12 միլիոն դոլար։ Կոսի խոսքով՝ այս գումարը նախատեսված է ոչ միայն Հայաստանի կառավարության, այլև քաղաքացիական հասարակության և լրատվամիջոցների համար, որոնց դերը, ըստ եվրահանձնակատարի, կարևոր է հիբրիդային սպառնալիքների դեմ արդյունավետ պայքարի գործում։