Հայաստանի Ազգային ժողովի նախագահ Ալեն Սիմոնյանը լրագրողների հետ զրույցում ասել է, որ ոչ ոք չի բացառում Հայաստանի՝ Հավաքական անվտանգության պայմանագրից դուրս գալու որոշումը։

Ալեն Սիմոնյանին հարցրել են Ռուսաստանի ԱԳ նախարարության ներկայացուցիչ Մարիա Զախարովայի հայտարարության մասին, թե Հայաստանի ժողովրդին ձեռնտու չէ դուրս գալ Հավաքական անվտանգության պայմանագրի կազմակերպությունից։ Ալեն Սիմոնյանը սկզբում նշեց, որ չի ցանկանում մեկնաբանել Զախարովայի հայտարարությունը, ապա հավելեց.

«Ես կարծում եմ, որ Հայաստանի հետ սպառնալից լեզվով խոսելը շատ վատ տրամաբանություն է։ Այսինքն՝ ուզում եմ իմանալ՝ Հայաստանի հետ սպառնալի՞ լեզվով են խոսում ու կարծում են, որ հայերը պետք է մտածեն, որ հակառակ դեպքում ադրբեջանցիների միջոցով կհարձակվեն մեզ վրա։ Այսպես թե այնպես տեսել ենք։ Մենք Հավաքական անվտանգության պայմանագրի կազմակերպությունում էինք, երբ ականատես եղանք Հայաստանի վրա մեկ այլ երկրի հարձակումներին։ Հետո գլուխներն այնպես բռնեցին, կարծես ոչինչ չէր լինում»,- ասել է Սիմոնյանը։

Սրան զուգահեռ Ալեն Սիմոնյանը նշեց, որ Հայաստանում հակառուսական քարոզարշավ չի եղել։

«Ուրիշ բան եմ ուզում հարցնել՝ եթե ես հարձակվեմ ձեզ վրա, իսկ դուք դիմադրեք ինձ, դա հակաալենի արշավ կլինի՞։ Այսինքն՝ պետք է հանգստանայինք ու վայելեինք»,- նշել է Սիմոնյանը։