Հունվարի 4-ին հայկական կողմը պատասխանել է «խաղաղության պայմանագրի» վերաբերյալ ադրբեջանական կողմի առաջարկներին, պայմանավորվածություն կա սահմանագծող հանձնաժողովների նիստ անցկացնելու վերաբերյալ,- այս մասին Հայաստանի հանրային հեռուստատեսությանը տված հարցազրույցում հայտարարել է Հայաստանի Անվտանգության խորհրդի քարտուղարը:

«Այժմ մենք սպասում ենք Ադրբեջանի պատասխանին։ Դինամիկան մենք նույնպես դրական ենք գնահատում, թեև կան հարցեր, որոնց շուրջ բանավոր բանակցությունների ընթացքում համաձայնության ենք եկել, բայց խաղաղ պայմանագրի տեքստում հետընթաց տեսանք։

Մենք ակնկալում ենք, որ խաղաղության պայմանագիրը հնարավորինս շուտ կստանա իր վերջնական տեսքը։ Այն, ինչ դրված է բանակցությունների սեղանին, և այն, ինչ Հայաստանը առաջարկում է Ադրբեջանին, Հայաստանի համար անվտանգության երաշխիքներ է ստեղծում»,- ասել է Արմեն Գրիգորյանը։