Ժամանակակից, «խելացի» հասարակական տրանսպորտի համակարգի միջոցով բոլորը կկարողանան հարմարավետ և արագ տեղաշարժվել քաղաքում,- այս մասին հայտարարել է Թբիլիսիի քաղաքապետ Կախա Կալաձեն՝ իր ելույթում քաղաքային խորհրդի նիստում։

Թբիլիսիի քաղաքապետը խոսել է մայրաքաղաքում տրանսպորտային քաղաքականության ոլորտում արդեն իսկ իրականացված ու նախատեսվող մեծածավալ ծրագրերի մասին։

«Մենք կարողացել ենք արդիականացնել հասարակական տրանսպորտը։ Մենք ներկայացրել ենք ժամանակակից, եվրոպական տիպի էկոլոգիապես մաքուր ավտոբուսներ։ Մենք սկսել ենք երթուղայինների պարկը ամբողջությամբ վերանորոգելու ծրագիր։ Մինչև տարեվերջ միկրոավտոբուսներն ամբողջությամբ կփոխարինվեն, հաջորդ տարվանից փուլ առ փուլ կվերազինվեն և կտեղափոխվեն համապատասխան երթուղիներ։ Կիրականացվեն նաև մետրոյի արդիականացման և էկոլոգիապես մաքուր տրանսպորտի խթանման ծրագրեր։ Մենք ստեղծում ենք տասը տարանցիկ միջանցք, և համաժամացումը կիրականացվի բոլոր տեսակի հասարակական տրանսպորտի միասնական համակարգում։ Թբիլիսիին կավելացվի ևս 200 նոր ավտոբուս»,- ասել է Կախա Կալաձեն։

Թբիլիսիի քաղաքապետի խոսքով՝ այդ միջոցառումների արդյունքում ավտոբուսի սպասման ժամանակը միջինը 20 րոպեից կկրճատվի յոթ րոպե։

«Ցավոք սրտի, որոշ թաղամասերում կա՛մ ընդհանրապես չկա հասարակական տրանսպորտ, կա՛մ սպասման ժամանակը շատ երկար է։ Առաջիկա տարիներին այս խնդիրը կլուծվի։ Մետրոպոլիտենին կավելացվեն նոր վագոններ, տրանսպորտային ծառայություններ ստանալիս կներդրվի բաժանորդային միասնական համակարգ, կկազմակերպվեն ճոպանուղիներ և 515 կմ երկարությամբ հեծանվային գոտի։ Կիրականացվի տաքսիների բարեփոխման երրորդ փուլը, որը կհանգեցնի քաղաքի տրանսպորտային համակարգի վերջնական փաթեթին»,- ասել է Կախա Կալաձեն։

Թբիլիսիի քաղաքային խորհուրդը քննարկում է մունիցիպալ կառավարության նոր կազմը հաստատելու հարցը։