Հարավային Կորեայի նախկին նախագահը դատապարտվել է 24 տարվա ազատազրկման
15:30, 06.04.2018
Սեուլի Կենտրոնական դատարանը Հարավային Կորեայի նախկին նախագահ Պակ Կըն Հեին, որը կոռուպցիայի մեջ է մեղադրվում, 24 տարվա ազատազրկման է դատապարտել։ Այս մասին հաղորդում է Reuters-ը։
2016-ին Հարավային Կորեայում կոռուպցիոն սկանդալ բարձրացավ։ Նախկին նախագահն իրեն շրջապատել էր աղանդավորներով և գուշակներով, որոնք հասանելիություն ունեին պետական գաղտնի փաստաթղթերին և ազդում էին երկրի կառավարման ընթացքի վրա։
Հատկապես մեծ հեղինակություն էր վայելում Չհուվե Սուն Սիլը։ Նախագահի անունն օգտագործելով՝ նա ճնշում էր գործադրում տասնյակ խոշոր ընկերությունների վրա, որպեսզի նրանք գումարներ փոխանցեն երկու հասարակական հիմնադրամների։
Արդյունքում Պակ Կըն Հեին մեկուսացրեցին իշխանությունից և 2017-ի մարտին ձերբակալեցին։
