Առողջապահության համաշխարհային կազմակերպության եվրոպական տարածաշրջանային տնօրեն Հանս Կլյուգեն լավագույն օրինակներից է համարել Վրաստանում դեղերի հասանելիության ուղղությամբ իրականացվող բարեփոխումները։ Տեղեկությունը տարածում է Առողջապահության նախարարության մամուլի ծառայությունը։

Առողջապահության համաշխարհային կազմակերպության Եվրոպական տարածաշրջանային կոմիտեի 73-րդ նիստում Հանս Կլյուգեն նշել է, որ Վրաստանում իրականացվող համակարգային բարեփոխումները, գների կարգավորումը և տեղեկանք գների որոշումը հնարավորություն են ստեղծել ուռուցքաբանական դեղամիջոցների արժեքը 45%-ով նվազեցնելու։

Նրա խոսքով, այս փոփոխությունները թույլ են տալիս պետությանը կրկնակի շատ դեղորայք ձեռք բերել։ Առողջապահության համաշխարհային կազմակերպության եվրոպական տարածաշրջանային տնօրենն իր ելույթում խոսել է նաև Վրաստանում առողջապահության նախարարի հետ հանդիպման մասին և նշել, որ Զուրաբ Ազարաշվիլիի հետ քննարկել է դեղագործության ոլորտում իրականացվող բարեփոխումները։

«Եթե մարդիկ չեն կարող իրենց թույլ տալ բժշկի գնալ կամ վճարել դեղորայքի համար, դա պարզապես գործնական խնդիր չէ, դա էթիկական խնդիր է, քանի որ մարդիկ կորցնում են վստահությունը կառավարությունների, մեր նկատմամբ: Այնուամենայնիվ, կան շատ լավ օրինակներ: Վերջերս ես Վրաստանի գեղատեսիլ Թբիլիսիում էի, որպեսզի առողջապահության նախարար պարոն Զուրաբ Ազարաշվիլիի հետ քննարկեի, թե ինչպես են նրանց հաջողվել միասնական աշխատանք իրականացնել գների կարգավորման, տեղեկատու գների վերաբերյալ, ինչը, ի վերջո, հնարավորություն տվեց նվազեցնել ուռուցքաբանական դեղամիջոցների գները 45%-ով, ինչը նշանակում է, որ այժմ Վրաստանը երկու անգամ ավելի շատ դեղամիջոցներ ձեռք բերելու հնարավորություն ունի»,- ասել է Հանս Կլյուգեն Առողջապահության համաշխարհային կազմակերպության Եվրոպական տարածաշրջանային կոմիտեի 73-րդ նիստում։

Տեղեկությունը տարածում է Առողջապահության նախարարության մամուլի ծառայությունը։