Հանքափորները խուսափեցին Ճիաթուրայի տեղական ինքնակառավարման շենքի պիկետավորումից։ Նրանց խոսքով, ունեն ոչ պաշտոնական տեղեկություն, որ իշխանությունները պատրաստվում են բավարարել իրենց պահանջները, սակայն բողոքի ակցիան շարունակվում է։

Հանքափորները շարունակում են պահանջել իրենց աշխատավարձը, «Ջորջիան Մանգանեզ» ընկերության գործունեության քննություն, դրա հեռացումը Ճիաթուրայից և ընդերքի արդյունահանման գործընթացի փոխանցումը պետությանը։

Հիշեցնենք, որ «Ջորջիան Մանգանեզ» ընկերությունը մարտի 1-ից հայտարարեց ընդերքի արդյունահանման ստորգետնյա աշխատանքների դադարեցման մասին՝ որպես պատճառ նշելով դրանց ոչ շահութաբերությունը։

Այս որոշմանը նախորդել էր անցած տարվա նոյեմբերի 1-ից աշխատանքների վեցամսյա դադարեցումը, որի ընթացքում աշխատակիցները ստացել էին խոստում իրենց աշխատավարձի 60%-ի վճարման մասին։ Հանքափորների խոսքով, «Ջորջիան Մանգանեզ» ընկերությունը վճարել է այդ 60%-ը միայն երեք ամիսների ընթացքում։