«ԵՄ գնահատողների առաքելությունը դրական է գնահատում Վրաստանի գյուղատնտեսության ոլորտում ձեռք բերված առաջընթացը»,- հայտնում է Շրջակա միջավայրի պահպանության և գյուղատնտեսության նախարարությունը։

Գործակալության տվյալներով՝ Վրաստանի շրջակա միջավայրի պահպանության և գյուղատնտեսության նախարարի առաջին տեղակալ Նինո Թանդիլաշվիլին հանդիպում է ունեցել ԵՄ գնահատողների առաքելության հետ։

«Եվրամիության ներկայացուցիչները մշտադիտարկել են Գյուղատնտեսության և գյուղի զարգացման եվրոպական հարևանության ծրագրի (ENPARD) չորրորդ փուլի 2023 թվականի համար ստանձնած պարտավորությունների կատարումը, որը ներառում է սննդի անվտանգության և գյուղական զարգացման բաղադրիչները։

Գնահատողների առաքելությունը դրական է գնահատել Վրաստանի ստանձնած պարտավորությունների կատարման դինամիկան և դրական լույսի ներքո դիտարկել Վրաստանի գյուղատնտեսության ոլորտում ձեռք բերված առաջընթացն ու արդյունքները։ Եվրամիության ներկայացուցիչները վրացական կողմին կարևոր առաջարկություններ են փոխանցել Եվրամիությանն անդամակցելու ճանապարհին գյուղատնտեսության և գյուղական համայնքների զարգացման առումով։ Նինո Թանդիլաշվիլին շնորհակալություն է հայտնել ԵՄ գնահատողների առաքելությանը դրական գնահատականի համար և պատրաստակամություն հայտնել շարունակել համագործակցությունը ապագայում։

Վրաստան կատարած այցի շրջանակներում ԵՄ գնահատողների առաքելությունը հանդիպումներ է ունեցել նախարարության համապատասխան գերատեսչությունների, Սննդի ազգային գործակալության, Գյուղական զարգացման գործակալության և Վրաստանի մելիորացիայի ներկայացուցիչների հետ։ Գյուղատնտեսության և գյուղի զարգացման եվրոպական հարևանության ծրագիրը (ENPARD) Վրաստանում գործում է 2013 թվականից: ENPARD-ը Եվրամիության ամենահաջող ծրագրերից է, որի նպատակն է աջակցել երկրում գյուղատնտեսության զարգացմանը, գյուղական բնակչության կենսամակարդակի բարելավմանը, աղքատության մակարդակի նվազեցմանը և տեղական բնակչության զբաղվածության խթանմանը նաև Վրաստանում արտադրվող ապրանքների որակի և մրցունակության բարձրացում և դրանց արտահանման խթանում դեպի Եվրամիություն»,- ասվում է գործակալության հաղորդագրությունում։