«Վրացական երազանք» կուսակցության ռեժիմը ոչինչ չի արել, որպեսզի պահպաներ այն նորմերն ու ստանդարտները, որոնք անհրաժեշտ են առանց վիզայի մուտքի պահպանման համար», – այս մասին հայտարարել է «Լելո – Ուժեղ Վրաստանի համար» կուսակցության անդամ Գրիգոլ Գեգելիան։

Նրա խոսքով, պատասխանատվությունը ամբողջությամբ «Վրացական երազանքին» է վերաբերում։

««Վրացական երազանքի» ռեժիմի հետ որևէ երկխոսություն տեղի չի ունենա, քանի դեռ պահպանվում է ներկայիս քաղաքական կուրսը։ Եթե ազատ արձակվեն քաղաքական բանտարկյալները, նշանակվեն նոր ազատ ընտրություններ և երկրում հնարավոր դառնա ժողովրդավարական գործընթացների զարգացումը, այդ դեպքում Եվրոպան կարող է հետաքրքրված լինել Վրաստանի պետականության և նույնիսկ այս ռեժիմի հետ որոշ հարցերով քննարկման տեսանկյունից։ Հակառակ դեպքում որևէ խորքային երկխոսություն այս քաղաքականության պայմաններում հնարավոր չի լինի, սա Եվրոպայի հստակ դիրքորոշումն է։

Ինչ վերաբերում է որոշ եվրոպացի պատգամավորների հայտարարություններին, որ Եվրոպան կոչ է անում երկխոսության «Վրացական երազանքի» հետ, ասեմ հետևյալը՝ «քոցիները» կան ամենուր։ Քոցիները միայն Վրաստանում չեն. նրանք նաև Հունգարիայի իշխանության մեջ են, և այլ պետություններում նույնպես։ Կարևորը, որ քոցիները ոչինչ չղեկավարեն, իսկ Եվրոպայում նրանք ոչ մի բան չեն ղեկավարում։ Մենք արդեն տեսանք, որ Եվրահանձնաժողովի զեկույցում պաշտոնապես նշված է՝ առանց վիզայի ռեժիմի դադարեցումը լիովին իրատեսական ռիսկ է։ Սա այն սցենարներից է, որ կանգնած է մեր պետության առաջ, և դրա պատասխանատվությունը կրում է «Վրացական երազանքի» ռեժիմը։ Այս ռեժիմը ոչինչ չի արել՝ պահպանելու այն նորմերն ու ստանդարտները, որոնք անհրաժեշտ են առանց վիզայի ռեժիմի պահպանման համար։ Նա արել է ամեն բան, որպեսզի մեր պետությունը կորցնի այդ ռեժիմը։ Հետևաբար, ամբողջ պատասխանատվությունը դրվում է «Վրացական երազանքի» հանցավոր, ինքնահռչակ ռեժիմի վրա», – հայտարարել է Գեգելիան։

Հիշեցնենք, որ Եվրոպական հանձնաժողովը հրապարակել է զեկույց, որը վերաբերում է գործընկեր պետությունների կողմից վիզայի ազատականացման պայմանների կատարմանը։ Զեկույցում նշվում է. «ծայրահեղ դեպքում Վրաստանը կարող է կորցնել վիզայի ազատ ռեժիմը»։