Դուբայում ընթացող կառավարությունների գագաթնաժողովի շրջանակում Վրաստանի կրթության, գիտության և երիտասարդության հարցերով նախարար Գիվի Միքանաձեն աշխատանքային հանդիպում է անցկացրել Ադրբեջանի Հանրապետության գիտության և կրթության նախարար Էմին Ամրուլաևի հետ։

Վրաստանի Կրթության նախարարության տեղեկացմամբ՝ կողմերը քննարկել են համագործակցության շրջանակում ընթացիկ նախագծերի արդյունքները և դրանց ընդլայնման հնարավորությունները։

Շեշտը դրվել է Վրաստանի և Ադրբեջանի միջև կրթական ոլորտում ձևավորված բազմամյա և հաջողված գործընկերության վրա։ Գիվի Միքանաձեն նշել է, որ Ադրբեջանը Վրաստանի կարևոր գործընկերն է, և երկկողմ հարաբերությունները նպաստում են համատեղ տեսլականների ձևավորմանն ու կոնկրետ արդյունքների ստացմանը։

Հատուկ ուշադրություն է դարձվել ադրբեջանցի և վրացի ուսուցիչների վերապատրաստմանը և այդ ուղղությամբ իրականացված միջոցառումներին։

Իր հերթին, Ադրբեջանի կրթության նախարարն ընդգծել է երկրների միջև համագործակցության դինամիկան և երկու նախարարությունների աշխատանքային խմբերի արդյունավետությունը։ Նա ևս մեկ անգամ հայտնել է պատրաստակամություն՝ համատեղ կրթական և գիտական նախագծեր իրականացնելու ուղղությամբ։

Կողմերը հաստատել են պատրաստակամություն՝ գործընկերությունը խորացնելու կրթության բոլոր մակարդակներում և քննարկել են այդ ուղղությամբ ապագա ծրագրերը։