Ես ուղղակիորեն ասում եմ, որ «Վրացական երազանքին» շատ ծանր օր է սպասվում երկրի ներսում և դրսում։ Դա դուք անպայման կտեսնեք, Եվրամիության ութ երկրների արտաքին հարաբերությունների հանձնաժողովի նախագահների պատվիրակության հետ հանդիպումից հետո ասել է «Միասնություն-Ազգային շարժման» առաջնորդներից Գիորգի Վաշաձեն։

Վաշաձեի խոսքով՝ հանդիպմանը քննարկել են ձեռնարկվելիք քայլերը, այդ թվում՝ պատժամիջոցների հարցը։

«Մենք խոսեցինք հետաքննության մեխանիզմների մասին, ամեն ինչի, այդ թվում՝ պատժամիջոցների, Եվրոպայի կողմից ձեռնարկվելիք քայլերի մասին, բայց խոսեցինք նոր մեխանիզմների մասին, որոնց մասին դեռ չենք պատրաստվում հրապարակայնորեն խոսել։ Հասարակությունը կտեսնի, որ մենք հստակ ծրագիր ունենք, ի վերջո, ինչպես հասնել արդարության, որպեսզի նորից ընտրություններ անցկացվեն։ Անկեղծ եմ ասում՝ «Վրացական երազանքին» շատ ծանր օր է սպասվում երկրի ներսում և դրսում։ Դուք սա անպայման կտեսնեք»,- ասել է Գիորգի Վաշաձեն։

Ինչպես նշեց Վաշաձեն, եվրոպացի խորհրդարանականները աջակցում են Վրաստանում անցկացված ընտրությունների վերաբերյալ միջազգային հետաքննությանը։

«Նրանք աջակցում են միջազգային հետաքննությանը։ Երբ կառավարությունը հրաժարվում է դա անել, դա ևս մեկ վառ ապացույց է, որ այդ մարդիկ հանցագործ են, նրանք փորձում են կոծկել իրենց կազմակերպված համակարգված հանցագործությունը, որը կատարել են Վրաստանի դեմ»,- ասել է Գիորգի Վաշաձեն։