Ամերիկացի գործընկերները տեղյակ են երկրում տեղի ունեցող բոլոր հարցերից, և ոչ ոք չի կարողանա այս հանդիպումներն այնպես ներկայացնել, կարծես թե ինչ-որ բանի նորմալացում կարող է տեղի ունենալ. այս մասին «Ընդդիմադիր դաշինքի» առաջնորդներից մեկը՝ Գիորգի Վաշաձեն, հայտարարել է ԱՄՆ պետքարտուղարի օգնականի տեղակալ Սոնատա Կոլտերի հետ հանդիպումից հետո։

Նրա խոսքով՝ երկրում առկա խնդիրների լուծման բանալին գտնվում է Վրաստանում, այլ ոչ թե Վաշինգտոնում կամ Բրյուսելում։

«Մեր դիրքորոշումը շատ հստակ է։ Մեր՝ ժողովրդավարական ընդդիմության, այդ թվում՝ «Ընդդիմադիր դաշինքի» խնդիրն է Վրաստանը վերադարձնել եվրատլանտյան զարգացման ուղի, վերականգնել Արևմուտքի հետ խզված հարաբերությունները, բայց մենք շատ հստակ և միանշանակ տեսնում ենք, որ այս ռեժիմի պայմաններում դա անհնար է։ Կարծում եմ՝ մեր ամերիկացի գործընկերները դա շատ լավ տեսնում են։ Մենք ամեն ինչ կանենք, որպեսզի ոչ միայն փոխվի ռեժիմը, այլև շատ արագ վերականգնվեն այդ հարաբերությունները։ Սա էր մեր հստակ ուղերձը այս հանդիպմանը։ Նրանք տեղյակ են երկրում տեղի ունեցող բոլոր իրադարձություններից, և ոչ ոք չի կարող վաճառել այս հանդիպումներն այնպես, ասես տեղի ունեցող գործընթացների նորմալացում է հնարավոր։ Նրանք շատ հստակ տեսնում են ժողովրդավարության և օրենքի գերակայության առումով տիրող ծանր իրավիճակը»,- նշել է Վաշաձեն։

ԱՄՆ պետքարտուղարի օգնականի տեղակալի հետ հանդիպմանը մասնակցել են նաև «Լելո – Ուժեղ Վրաստան», «Գախարիան՝ հանուն Վրաստանի» և «Ընդդիմադիր դաշինքի» առաջնորդները։ Հանդիպմանը ներկա է եղել նաև ԱՄՆ դեսպանի պաշտոնակատար Ալան Փերսելը։