ԿԸՀ նախագահ Գիորգի Կալանդարիշվիլիի հայտարարությամբ, Վրաստանում ընտրական գործընթացում էլեկտրոնային տեխնոլոգիաների ներդրումը հաջողությամբ իրականացվել է։
«Ընտրական վարչակազմի գրեթե երկու տարվա անխոնջ աշխատանքը տվել է համապատասխան արդյունքներ, և այսօր հպարտությամբ կարող ենք հայտարարել, որ գործընթացի մեր պլանավորումն ու կազմակերպումը բոլոր փուլերում ճիշտ է իրականացվել։
Խոսքս հաստատելու համար մի քանի վիճակագրական տվյալներ կտամ։ Հոկտեմբերի 26-ի ընտրությունների օրը ընդհանուր առմամբ օգտագործվել է 15000 սարք, որից միայն 20-ն էր անսարք։ Չնայած դրան, բոլոր դեպքերում հնարավոր է եղել շարունակել ընտրական գործընթացը տեխնոլոգիայի կիրառմամբ, և ոչ մի տեղամասում անհրաժեշտություն չի եղել անցնել քվեարկության ավանդական եղանակին։
Ըստ առկա լավ պրակտիկայի՝ տեխնոլոգիաների կիրառման ժամանակ շատ լավ արդյունք է համարվում, եթե ընտրական գործընթացի ժամանակ սարքերի մեկ տոկոսը անսարք է եղել, իսկ մեր դեպքում այդ թիվը կազմել է մոտ 0,1%, ինչը շատ լավ արդյունք է», – ասել է Կալանդարիշվիլին։
ԿԸՀ նախագահը շնորհակալություն հայտնեց ընտրական վարչակազմի յուրաքանչյուր աշխատակցի գործունեության, ընտրությունների արդիականացման գործընթացում ներդրած ավանդի և մասնագիտական բարձր մակարդակով վարելու համար։
«Էլեկտրոնային տեխնոլոգիաների պատշաճ շահագործումը հաստատել է pro v&v միջազգային աուդիտորական ընկերությունը, որը երկար տարիների փորձ ունի ԱՄՆ-ում և այն երկու ընկերություններից մեկն է, որն ունի համապատասխան հաստատությունների պատշաճ հավատարմագրում Ամերիկայում։ Այն ոչ միայն քվեարկության համակարգը փորձարկելու իրավասություն ունի և ընտրական լաբորատորիա է, այլև լիցենզիաներ է տրամադրում վաճառող ընկերություններին, որոնք կիրառում են տարբեր տեխնոլոգիաներ։ Քիչ առաջ ավարտեցի հանդիպումը նշված ընկերության ներկայացուցիչների հետ։ Նրանք մեզ պաշտոնապես տվեցին առաջին և երկրորդ փուլի աուդիտի հաշվետվությունը, որը հաստատում է սարքերի ճիշտ աշխատանքը։ Փաստաթուղթն անմիջապես կթարգմանվի և հասանելի կդառնա բոլոր ներգրավված կողմերին, այդ թվում՝ միջազգային կազմակերպություններին: Նշված փաստաթուղթը պատասխանում է բոլոր հարցերին, այդ թվում՝ մանիպուլյատիվ կերպով բարձրացված հարցին, իբր ընտրողների միասնական ցուցակում կրկնվող փաստեր կան։ Այս պնդումն անհիմն է մի քանի գործոնների պատճառով։ Ընթացքում կա թղթային հետք, ցուցակները տպագրվել են բոլոր ստուգող մեքենաներից և այն հասանելի է եղել բոլոր շահագրգիռ կողմերին, էլ չեմ խոսում այն մասին, որ և՛ քաղաքական կուսակցությունները, և՛ դիտորդ կազմակերպությունները կարող են պահանջել և ստուգել հրապարակային տարբերակը։
Ամերիկյան նշված ընկերությունն այսօր ևս մեկ անգամ հաստատեց, որ ընտրացուցակների հետ կապված հարցերն անհիմն են և հաստատեցին, որ կիրառվող տեխնոլոգիաները համապատասխանում են ինչպես տեղական օրենսդրությանը, այնպես էլ միջազգային լավ փորձին ու չափանիշներին։ Այստեղ ես ուզում եմ հատուկ շնորհակալություն հայտնել «Սմարտմատիկ» ընկերությանը, որի հետ համագործակցությամբ իրականացվել է ընտրությունների արդիականացման գործընթացը։ Հիշեցնենք, որ նշված ընկերությունը արդիականացնում է ընտրություններն աշխարհի ավելի քան 30 երկրներում։ Դրանցից՝ ԱՄՆ-ում, Կանադայում, Էստոնիայում, Բելգիայում և այլն։ Եվս մեկ անգամ ցանկանում եմ շնորհակալություն հայտնել բոլոր ներգրավված կողմերին, դիտորդական կազմակերպություններին, լրատվամիջոցներին և այն գերատեսչություններին, որոնք մեզ հետ համագործակցել են ընտրությունների կազմակերպման գործընթացում»,- ասել է Կալանդարիշվիլին։
ԿԸՀ նախագահի խոսքով, ընտրողը հեշտությամբ հարմարվեց ընտրական տեխնոլոգիաներին, ինչը վկայում է, որ ընտրություններից մեկուկես տարի առաջ սկսված ընտրական վարչությանը իրազեկելու քարոզարշավն արդյունավետ է եղել։
«Շնորհակալ եմ ընտրողներին ակտիվության եւ քաղաքացիական բարձր պատասխանատվության համար։ Ինչ վերաբերում է արդյունքներին: Այս պահին հաշվվել են 3100 տեղամասերի արդյունքները, ինչը կազմում է ընտրական տեղամասերի ավելի քան 99,646%-ը, իսկ համապատասխան արձանագրությունները տեղադրվել են՝ results.cec.gov.ge կայքում։ Սպասում եմ ինը շրջանների արդյունքներին (հաշվետվություններին), որ ուղարկեն արտերկրից։
Ըստ նախնական արդյունքների՝ ընտրողների ձայները բաշխվել են հետևյալ կերպ.
«Վրաստանի միասնության և զարգացման կուսակցություն» 3950 ձայն՝ 0,191 տոկոս: «Կոալիցիա հանուն փոփոխությունների Գվարամիա, Մելիա, Գիրչի, դրոա»՝ 225 680 ձայն, 10,923 տոկոս: «Միասնություն-Ազգային շարժում»՝ 209137 ձայն, 10,122 տոկոս: «Եվրոպացի դեմոկրատներ» 8036 ձայն, 0,389 տոկոս: «Վրաստանի հայրենասերների դաշինք» 50463 ձայն, 2,442 տոկոս: «Ուժեղ Վրաստան – Լելո, հանուն ժողովրդի, հանուն ազատության»՝ 181 424 ձայն, 8.781 տոկոս: «Վրաստանի Լեյբորիստական կուսակցություն»՝ 15 057 ձայն, 0.729 տոկոս: «Մեր միասնական Վրաստանը»՝ 1866, 0,09 տոկոս: «Փոխիր Վրաստանը» 12565 ձայն, 0,608 տոկոս: «Վրաստան» 2775 ձայն, 0,134 տոկոս: «Ազատ Վրաստան» 4149 ձայն, 0,201 տոկոս: «Տրիբունա» 2487 ձայն, 0,12 տոկոս: «Մենք»՝ 2595 ձայն, 0,126 տոկոս: «Գախարիա հանուն Վրաստանի» 160 354 ձայն, 7,761 տոկոս: «Ձախակողմյան դաշինք»՝ 1388 ձայն, 0,067 տոկոս: «Վրացական միասնություն» 4503 ձայն, 0,218 տոկոս: «Գիրչի» 62 217 ձայն՝ 3,011 տոկոս: «Վրացական երազանք» 1 մլն 117 հազար 480 ձայն, 54,086 տոկոս»,- այսօր կայացած ճեպազրույցում ասել է Գիորգի Կալանդարիշվիլին։
