Վրաստանի վարչապետ Գիորգի Գախարիայի հայտարարությամբ, կառավարության այսօրվա նիստում քննարկելու են, թե ինչպես կարելի է սկսել տնտեսության բացումը փուլերով որքան հնարավոր է արագ, ապահով և ողջամիտ:

Ըստ նրա, ներկայիս միտումները տալիս են զգույշ օպտիմիզմի հնարավորություն:

«Կառավարության ձևաչափում մենք պետք է անդրադառնանք այն խնդրին, որը հուզում է մեզանից յուրաքանչյուրին և մեր քաղաքացիներին, թե ինչպես կարելի է հնարավորինս արագ, բայց ապահով և ողջամիտ կերպով սկսել տնտեսության բացումը: Մենք մի քանի անգամ ասել ենք, որ երբ մենք նպատակային սահմանափակումներ ենք հաստատել, դա դեկտեմբերի վերջն էր, դա ուներ որոշակի նպատակ: Դժբախտաբար, այդ ժամանակ երկրում վարակի տարածվածության մակարդակը չափազանց բարձր էր, որոշ քաղաքներում գերազանցելով 30 տոկոսը: Այսօրվա դրությամբ ես կարող եմ ձեզ ասել, որ երեկ արված 18 000 թեստերից դրական ցուցանիշը կազմում է ընդամենը 723, ինչը մեզ համար դեռ մեծ թիվ է, չնայած այն արդեն մոտեցել է 4 տոկոսի: Այստեղ կցանկանայի ընդգծել, որ երբ յոթ օրվա ընթացքում մենք կունենանք 4 տոկոսանոց ցուցանիշ, մենք կարող ենք ավելի համարձակ, զգուշորեն, բայց ողջամտորեն բացել տնտեսությունը: Եվ թվում է, որ այսօրվա միտումները տալիս են օպտիմիզմի հնարավորություն: Այսպիսով, այսօր մենք պետք է սկսենք քննարկել, թե արդյոք պահպանենք նման միտումը հաջորդ մեկ շաբաթվա ընթացքում, ճիշտ ինչպես արեցինք ամռանը, աստիճանաբար բացումը սկսենք մի փոքր շուտ: Սա առաջին հերթին վերաբերում է Թբիլիսիին, Քութայիսիին և Ռուսթավիին: Առաջին հերթին վերաբերում է ուսումնական հաստատություններին, որ երեխաներին հնարավորություն տանք ուսումը շարունակել դասասենյակներում: Իհարկե, դա ուղեկցվում է քաղաքային տրանսպորտի գործարկումով: Մենք պետք է դա քննարկենք քայլ առ քայլ, որպեսզի չվտանգենք համավարակային կառավարման ձեռքբերումը, որն այսօր փաստորեն ունենք վերջին երկու ամիսների համատեղ աշխատանքի արդյունքում:

Ամենակարևորը, մենք պետք է ամեն ինչ անենք, որպեսզի պահպանենք այս ձեռքբերումը, քանի դեռ չենք սկսել զբոսաշրջության բացումը: Ինչպես գիտեք, փոխվարչապետ Մայա Ցքիտիշվիլիի գլխավորած տնտեսական թիմը, մի քանի օր է, ինչ հանդիպում է տարբեր ոլորտների և բիզնեսի ներկայացուցիչների հետ: Այս հանդիպումների հիմնական նպատակն է տնտեսության բացումը դարձնել կայուն, ողջամիտ և անվտանգ: Բոլորս պետք է հասկանանք, որ ամեն օր 2000, 3000, 4000, 5000 վարակման դեպքում նորմալ տնտեսական կյանքի մասին խոսք լինել չի կարող: Այդ պատճառով մենք բոլորս պետք է ավելի պատասխանատու ու խոհեմ քայլեր ձեռնարկենք, սակայն զգույշ», – հայտարարել է Գախարիան: