Ես արձագանքել եմ կազմակերպված հարձակմանը, որը տեղի է ունեցել տարբեր ձևերով՝ բանավոր և այլն, և արձագանքը եղել է թղթե բաժակից սուրճ լցնելը, այո, ես դա արել եմ,- ասել է «Գախարիան՝ Վրաստանի համար» կուսակցության առաջնորդ Գիորգի Գախարիան ճեպազրույցում։

Գախարիայի խոսքով՝ «իրեն վախեցնելու կամ չեզոքացնելու այս ծիծաղելի փորձը կարժանանա պատասխանի»։

«Բաթումիում էի մեր կուսակիցների դատավարությանը: Երբ վերադարձա «Շերատոն» հյուրանոց, մուտքի մոտ տեսա մարդկանց մի քանի խումբ։ Ես նույնիսկ ներս չէի մտել, ու արդեն անպատվում էին, հայհոյում, փաստացի հարձակվում էին վրաս։ Սա խմբային կազմակերպված էր, որին հաջորդեց իմ համապատասխան արձագանքը։ Միաժամանակ երևում էր, որ մեկ մարդ հեռախոսով նկարահանում է այս ամենը։ Հյուրանոցի նախասրահն ամբողջությամբ դատարկ էր մարդկանցից, այդ թվում՝ հյուրանոցի աշխատակիցներից: Այն բանից հետո, երբ ես հյուրանոց մտա և արձագանքեցի, արդեն ակնհայտ էր, որ այդ մարդիկ անհարմար շարժվում էին և ամեն ինչ անում էին, որպեսզի նկատեմ, որ նրանք զինված են։ Այն բանից հետո, երբ ես արձագանքեցի և, չեմ ժխտի, նրանց թղթե բաժակով սուրճի մնացորդ հյուրասիրեցի, նրանք խմբով հարձակվեցին ինձ վրա։

Ինչպես ինձ ասացին բժիշկները, ես կորցրել էի գիտակցությունը։ Այս ամենը ձեզ ասում եմ, որովհետև այնպես, ինչպես այսօր ընթանում է նախաքննությունը, ինչպես վարվում են որոշ քարոզչական հեռուստաընկերություններ, փաստն այն է, որ նրանք չեն պատրաստվում արդար քննություն իրականացնել: Դրա մասին է վկայում այն, որ այս ամենը նախապես կազմակերպված էր։ Այն, ինչ նրանք նկարահանել են իրենց հեռախոսներով, հայտնվել է մեկ կոնկրետ հեռուստաընկերության տրամադրության տակ։ Փաստն այն է, որ տեսախցիկները և այն, ինչ ֆիքսվել է այս տեսախցիկներով, անհետացել են: Այդ տեսախցիկները հեռացնելու համար Շերատոնի և նրա ղեկավարության վրա հսկայական ճնշում է գործադրվել: Չնայած այս ամենին, մենք ստեղծել ենք հատուկ խումբ, որը մանրամասն կպարզի ամեն ինչ՝ ով է մասնակցել, ինչպես է կազմակերպվել։

Չնայած այս ամենին, ինձ վախեցնելու կամ չեզոքացնելու այս ծիծաղելի փորձը կստանա հետևյալ պատասխանը. Ես Վրաստանի յուրաքանչյուր քաղաքացու խոստանում եմ՝ ես լինելու եմ առաջնագծում բռնության և չարի դեմ պայքարում և կանեմ ամեն ինչ, որպեսզի մենք հաղթենք։ Այն բանից հետո, երբ Բիձինա Իվանիշվիլին կորցրեց և՛ իր համբավը, և՛ վրաց ժողովրդից մնացած փոքր վստահությունը, ես ամեն ինչ կանեմ, որպեսզի նա կորցնի իր համար ամենաթանկը՝ փողն ու իշխանությունը։ Սա իմ խոստումն է Վրաստանի յուրաքանչյուր քաղաքացու, և հավատացեք, որ ես անպայման կկատարեմ այդ խոստումը»,- ասել է Գախարիան։

Բացի այդ, այն հարցին, թե «Առաջինը Դո՞ւք եք սկսել ֆիզիկական առճակատումը, թե՞ Դիտո Սամխարաձեն», Գիորգի Գախարիան նշել է.

«Ես արձագանքում էի կազմակերպված հարձակմանը, որը տարբեր ձևեր ստացավ՝ բանավոր և այլն։ Այս արձագանքը դրսևորվել է՝ սուրճը թղթե բաժակիով լցնելով։ Այո, ես դա արեցի, որը կոչվում է սուրճ լցնել և թղթե բաժակ նետել»,- ասել է Գախարիան։

Տեղեկացնենք, որ հունվարի 22-ին Թբիլիսիի դատախազությունում հարցաքննվել է «Գախարիան հանուն Վրաստանի» կուսակցության առաջնորդ Գիորգի Գախարիան։

Ներքին գործերի նախարարությունը հետաքննություն է սկսել հունվարի 15-ին Բաթումիի «Շերատոն Բաթումիում» տեղի ունեցած միջադեպի առնչությամբ՝ Քրեական օրենսգրքի 126-րդ հոդվածով, որը բռնություն է ենթադրում։