Վրաստանի կրթության, գիտության և երիտասարդության նախարար Գիորգի Ամիլախվարին Բաքվում հյուրընկալվել է Ադրբեջանի Հանրապետության վարչապետ Ալի Ասադովին

Կրթության նախարարությունից հայտնում են, որ կողմերը քննարկել են Վրաստանի և Ադրբեջանի միջև երկարաժամկետ ռազմավարական գործընկերությունը և համագործակցության խորացման հարցեր։

«Նշվեց, որ ապագայում երկրների միջև ոլորտային գործընկերությունն ավելի կամրապնդվի, այդ թվում՝ հատուկ շեշտադրում է արվելու կրթության և գիտության ոլորտում իրականացվելիք համատեղ նախագծերի վրա։

Գիորգի Ամիլախվարին շնորհակալություն է հայտնել Ադրբեջանի վարչապետին հյուրընկալության համար և ասել, որ կրթության և գիտության ոլորտում Վրաստանի և Ադրբեջանի սերտ գործընկերությունը կօգնի երկրներին էլ ավելի մերձենալ: Գիորգի Ամիլախվարիի խոսքով, ինտենսիվ համագործակցություն է ընթանում գործընկեր նախարարության հետ՝ համատեղ կրթական ծրագրեր իրականացնելու նպատակով։

Ադրբեջանի Հանրապետության վարչապետ Ալի Ասադովը մեծ հարգանք է հայտնել Վրաստանի և վրաց ժողովրդի նկատմամբ և իր լիակատար պատրաստակամությունն է հայտնել հետագա համագործակցությունն ամրապնդելու համար։

Հանդիպմանը մասնակցել են կրթության, գիտության և երիտասարդության նախարարի առաջին տեղակալ Ալեքսանդր Ծուլաձեն, նախարարի տեղակալ Նոդար Պապուկաշվիլին և Ադրբեջանում Վրաստանի արտակարգ և լիազոր դեսպան Զուրաբ Պատարիձեն»,- նշված է գերատեսչության տեղեկատվության մեջ: