Գերմանիայում Ուկրաինայի դեսպան. Ծանր տեխնիկայից ոչ մի միավոր 100 օրվա ընթացքում Գերմանիայից չի ժամանել Ուկրաինա
Գերմանիայում Ուկրաինայի դեսպան Անդրեյ Մելնիկն ասում է, որ պատերազմում առաջնային խնդիրը Ռուսաստանի կողմից վերջին 100 օրվա ընթացքում օկուպացված տարածքների վերադարձն է։ Այս մասին, ըստ ուկրաինական լրատվամիջոցների, դիվանագետն ասել է գերմանական ZDF հեռուստաալիքի եթերում։
«Մենք երբեք չենք հրաժարվի Ղրիմից։ Սա հասկանալի է»,- ասաց դեսպանը, սակայն նշեց, որ պետք է իրատես լինել։
Անդրեյ Մելնիկի խոսքով, Ուկրաինան մարտադաշտում դեռ առավելություն չունի, ուստի առաջնային խնդիրը Ռուսաստանի կողմից վերջին 100 օրվա օկուպացված տարածքների վերադարձն է։
Ուկրաինայի դեսպանը դիմել է նաև Գերմանիայի կառավարությանը և ևս մեկ անգամ կոչ արել շուտով մատակարարել խոստացած զենքը։ Դեսպանը ողջունել է Գերմանիայի կանցլեր Օլաֆ Շոլցի հայտարարությունը Ուկրաինային զենք մատակարարելու վերաբերյալ։
«Սակայն, ճիշտն ասած, 100 օր է, ինչ Գերմանիայից ոչ մի միավոր ծանր տեխնիկա չի ժամանել Ուկրաինա»,- ասաց դեսպանը՝ հավելելով, որ Գերմանիայի կողմից խոստացված առաջին զենքը Ուկրաինա կհասնի միայն հունիսի վերջին։