Ես եկել եմ հայտարարելու՝ մենք ցանկանում ենք, որ Վրաստանը իր եվրոպական հեռանկարը իրականություն դարձնի։ Գերմանիան այս ճանապարհին կաջակցի Վրաստանին,- այսօր Թբիլիսի կատարած այցի ժամանակ ասել է Գերմանիայի Բունդեսթագի փոխնախագահ Քեթրին Գյորինգ-Էքարդը։

Ինչպես նշվում է Վրաստանում Գերմանիայի դեսպանության տարածած տեղեկատվության մեջ, օրվա առաջին կեսին Գերմանիայի Բունդեսթագի փոխնախագահը հանդիպել է Վրաստանի նախագահ Սալոմե Զուրաբիշվիլիին։ Նա նաև հանդիպում է ունեցել Վրաստանի խորհրդարանի նախագահ Շալվա Պապուաշվիլիի հետ։

«Հանդիպումների թեմաներն էին Եվրոպայում և Վրաստանում առկա իրավիճակը Ուկրաինայի դեմ Ռուսաստանի պատերազմի ֆոնին և Վրաստանում իրականացվելիք առաջնահերթությունների գործընթացը՝ Եվրամիության թեկնածուի կարգավիճակ ստանալու համար։ Տիկին Գյորինգ-Էքարդտը կոչ է արել Վրաստանին հետևել եվրոպական ուղուն և հաստատակամորեն իրականացնել անհրաժեշտ բարեփոխումները»,- ասվում է Գերմանիայի դեսպանատան տարածած հայտարարության մեջ։