Եվրամիության դուռը բաց է մնում, իսկ Վրաստանի վերադարձը եվրոպական արժեքներին և Եվրամիությանն անդամակցելու ուղին Վրաստանի իշխանությունների ձեռքում է,- այս մասին ասված է արտաքին գործերի և անվտանգության գերագույն հանձնակատար Կայա Կալասի և ընդլայնման հարցերով եվրահանձնակատար Մարտա Կոսի համատեղ հայտարարության մեջ։

Ինչպես նշվում է հայտարարության մեջ, Վրաստանի կառավարության գործողությունները և ժողովրդավարական հետընթացը պատճառ դարձան անդամակցության գործընթացի փաստացի դադարեցմանը արդեն այս տարվա հունիսին։

«Եվրամիությունը վշտացած է Իրակլի Կոբախիձեի հայտարարությամբ՝ կապված «Վրացական երազանքի» որոշման հետ՝ չշարունակել բանակցությունները Եվրամիությանն անդամակցելու շուրջ մինչև 2028 թվականը և Եվրամիության ֆինանսական աջակցությունից հրաժարվելու վերաբերյալ։ Մենք նշում ենք, որ այս հայտարարությունը նշանակում է շեղում Վրաստանի նախկին բոլոր կառավարությունների քաղաքականությունից և վրաց ժողովրդի բացարձակ մեծամասնության եվրոպական նկրտումներից, ինչպես գրված է Վրաստանի Սահմանադրության մեջ։ Հիշեցնենք, որ վրացական իշխանությունների գործողությունները և ժողովրդավարական հետընթացը պատճառ դարձան անդամակցության գործընթացի փաստացի կասեցմանը արդեն այս տարվա հունիսին, իսկ Եվրամիության ֆինանսական օգնությունը, որն ուղղակիորեն ձեռնտու էր Վրաստանի իշխանություններին, ներկայումս կասեցված է։ Վրաստանի ժողովուրդը հերթական անգամ դուրս եկավ փողոց՝ հաստատելու Եվրամիությանն անդամակցելու իր ձգտումները։ Եվրամիությունը խստորեն դատապարտում է բռնությունը խաղաղ ցուցարարների նկատմամբ, ովքեր ամուր կանգնած են իրենց եվրոպական և ժողովրդավարական ապագայի համար: Վրաստանի կառավարության այս գործողություններն ուղղակիորեն ազդում են մեր հարաբերությունների վրա»,- ասված է հայտարարության մեջ։

Հայտարարության մեջ նշվում է նաև, որ Վրաստանի իշխանությունները պետք է հարգեն հավաքների և արտահայտվելու ազատության իրավունքը և զերծ մնան խաղաղ ցուցարարների, քաղաքական գործիչների և լրատվամիջոցների ներկայացուցիչների նկատմամբ ուժ կիրառելուց։

«Բռնության բոլոր գործողությունները պետք է հետաքննվեն, իսկ մեղավորները պետք է պատասխանատվության ենթարկվեն։ Եվրամիությունը կրկնում է իր լուրջ մտահոգությունը երկրում շարունակվող ժողովրդավարական հետընթացի կապակցությամբ, ներառյալ այն խախտումները, որոնք տեղի են ունեցել խորհրդարանական ընտրությունների նախաշեմին և ընթացքում: Այս համատեքստում ԵՄ-ն անհամբեր սպասում է ԵԱՀԿ/ԺՀՄԻԳ-ի վերջնական զեկույցին և նրա առաջարկություններին: Եվրամիությունը կանգնած է վրաց ժողովրդի և եվրոպական ապագայի համար նրա ընտրության կողքին։ Եվրամիության դուռը բաց է մնում, իսկ Վրաստանի վերադարձը եվրոպական արժեքներին և Եվրամիությանն անդամակցելու ճանապարհը գտնվում է վրացական իշխանությունների ձեռքում»,- ասված է հայտարարության մեջ։