Ֆրանսիայի նախագահի պաշտոնական կայքէջում Վրաստանի նախագահ Սալոմե Զուրաբիշվիլիի հետ հանդիպման վերաբերյալ հրապարակվել է կոմյունիկե:

Վրաստանի նախագահի աշխատակազմի տարածած տեղեկատվության համաձայն, կոմյունիկեում ասվում է, որ Ֆրանսիան, որը պատմության բարդ պահերին եղել է Վրաստանի կողքին, կշարունակի աջակցել նրան կայունության պահպանման և ժողովրդավարության ամրապնդման գործում:

Միաժամանակ նշվում է, որ Ֆրանսիան կոչ է անում Վրաստանի իշխանություններին անել հնարավորը, որպեսզի առաջիկա քաղաքային ընտրությունները համապատասխանեն ԵՄ ժողովրդավարական արժեքներին, նորմերին և չափանիշներին:

«Այս տարվա սեպտեմբերի 28-ին Ֆրանսիայի Հանրապետության նախագահը, Վրաստանի նախագահ Սալոմե Զուրաբիշվիլիի հետ միասին, գլխավորեցին 1921 թվականի հունվարին Ֆրանսիայի կողմից Վրաստանի ճանաչման 100-ամյակին նվիրված արարողությունը: Այս հատուկ արարողությունը ընդգծում է երկու երկրների հարաբերությունների կարևորությունը և Ֆրանսիայի դերը Վրաստանի ազատության, տարածքային ինքնիշխանության և անկախության պաշտպանության գործում վերջին դարում:

Այս ընդհանուր պատմությունը և ֆրանսիացի և վրացի ժողովուրդների միջև հաստատված սերտ կապերը ընկած են մեր երկու երկրներին ազատության գաղափարի շուրջ միավորող հատուկ հարաբերությունների հիմքում: Նրա մարմնավորումն է փոխգնդապետ Ամիլախվարի ծառայությունն ու զոհաբերությունը՝ 1942 թվականին Ֆրանսիան ազատագրելու համար Էլ Ալամեյնում, փոխգնդապետ, որը հայտնի է այս խոսքերով. «Մենք, օտարներս, միայն մեկ ձևով կարող ենք ապացուցել Ֆրանսիային մեր երախտագիտությունը, դա նրա համար մահն է»: Ֆրանսիան, որն իր պատմության ամենադժվար պահերին կանգնած է եղել Վրաստանի կողքին, կշարունակի աջակցել նրան կայունության պահպանման և ժողովրդավարության ամրապնդման գործում: Այն վերահաստատում է իր հանձնառությունը Վրաստանում հիմնարար իրավունքների, մասնավորապես `մամուլի ազատության, և եվրոպական ամենաբարձր չափանիշներին համապատասխան ժողովրդավարական և դատական ​​ինստիտուտների ամրապնդման նկատմամբ: Ֆրանսիան կոչ է անում Վրաստանի իշխանություններին անել հնարավորը, որպեսզի առաջիկա քաղաքային ընտրությունները համապատասխանեն ԵՄ ժողովրդավարական արժեքներին, նորմերին ու չափանիշներին: Նա հատուկ ուշադրություն կդարձնի անկախ Վրաստանի ժողովրդավարական հաստատությունների ապակայունացման ցանկացած փորձի, որը դեմ կլինի վրաց ժողովրդի ձգտմանը և Եվրամիության շահերին», – ասված է հաղորդագրության մեջ: