Ֆրանսիայի և Գերմանիայի համատեղ հայտարարությունը. Վրաստանում բոլոր քաղաքական ուժերը համաձայն են, որ ընտրական և դատական համակարգի հետագա բարեփոխումները պետք է մնան քաղաքական օրակարգի մեջտեղում, իսկ խորհրդարանը հարմար տեղ է նման քննարկման համար
Գերմանիան և Ֆրանսիան Վրաստանին կոչ են անում շարունակել ժողովրդավարական բարեփոխումների ուղին, – ասված է Վրաստանի վերաբերյալ ֆրանս-գերմանական համատեղ հայտարարության մեջ:
Հայտարարության համաձայն, Վրաստանում բոլոր քաղաքական ուժերը համաձայն են, որ ընտրական և դատական համակարգի հետագա բարեփոխումները պետք է մնան քաղաքական օրակարգի մեջտեղում, իսկ խորհրդարանը հարմար տեղ է նման քննարկման համար:
«Գերմանիայի և Ֆրանսիայի սերտ գործընկեր Վրաստանը վերջին երկու տասնամյակների ընթացքում զգալի ժողովրդավարական զարգացում է ապրել: Այն ամրապնդել է կապերը ՆԱՏՕ-ի և Եվրամիության հետ և օրինակելի դեր է խաղում Արևելյան գործընկերության շրջանակներում: Ուժեղ ինստիտուտների ստեղծումը և բազմակարծության պատշաճ գործունեությունը հզոր ժողովրդավարության հիմքերն են: Ըստ այդմ, մենք ողջունում ենք տարեսկզբին բոլոր քաղաքական կուսակցությունների կողմից ձեռք բերված քաղաքական կոնսենսուսը ընտրական համակարգի անհրաժեշտ փոփոխությունների վերաբերյալ: Վրացիները պատրաստակամություն են ցուցաբերել օգտվել այս բարեփոխման առաջարկած նոր խորհրդարանական բազմակարծությունից: Ընտրությունների առաջին փուլի ընթացքում ընտրողների բարձր մասնակցությունը խոստումնալից է, իսկ համաճարակի ֆոնին՝ հիանալի:
Այնուամենայնիվ, ԵԱՀԿ ժողովրդավարական հաստատությունների և մարդու իրավունքների գրասենյակի և տեղի քաղաքացիական հասարակության դիտորդները մատնանշեցին ընտրական գործընթացում առկա որոշ թերությունների մասին: Վրաստանի բոլոր քաղաքական ուժերը համաձայն են, որ հետագա ընտրական և դատական բարեփոխումները պետք է մնան քաղաքական օրակարգի հիմքում: Խորհրդարանը հարմար տեղ է նման քննարկման համար, քանի որ խորհրդարանական գործընթացը կամրապնդեր ինչպես ձեռք բերված արդյունքը, այնպես էլ դրա իրականացումը, և, ի վերջո, վստահությունը Վրաստանի պետական ինստիտուտների նկատմամբ: Մենք կցանկանայինք ընդգծել մեր աջակցությունը միջազգային միջնորդների նկատմամբ Եվրամիությունից և Միացյալ Նահանգներից: Նրանց նպատակն էր աջակցել Վրաստանի բոլոր քաղաքական կուսակցություններին՝ Վրաստանի ժողովրդավարական ինստիտուտների ամրապնդման համար կոնկրետ բարեփոխումներ իրականացնելու գործում:
Այն ժամանակ, երբ Վրաստանը կանգնած է մի շարք շրջանային մարտահրավերների առջև, առավել կարևոր է պահպանել երկրի միասնությունը: Ֆրանսիան և Գերմանիան, որպես գործընկերներ, պատրաստ են աջակցել Վրաստանին իր ընտրած ժողովրդավարության ճանապարհին: Աբխազիայի անջատողական շրջանի Ռուսաստանի Դաշնության հետ հետագա տնտեսական ինտեգրման շուրջ վերջերս կայացած բանակցությունների համատեքստում, մենք արտահայտում ենք մեր հզոր աջակցությունը Վրաստանի տարածքային ամբողջականության և ինքնիշխանության նկատմամբ՝ նրա միջազգայնորեն ճանաչված սահմաններում: Մենք կրկնում ենք, որ բոլոր կողմերը, այդ թվում նաև Ռուսաստանը, պետք է լիովին կյանքի կոչեն 2008 թ.-ի օգոստոսի 12-ին Եվրամիության միջնորդությամբ ստորագրված համաձայնագիրը և հասնեն կոնկրետ արդյունքների Ժնևի միջազգային բանակցությունների շրջանակներում», – ասված է համատեղ հայտարարության մեջ:
