Գերմանիայի նախագահ Ֆրանկ-Վալտեր Շտայնմայերը հաստատել է 2025 թվականի փետրվարի 23-ը որպես արտահերթ խորհրդարանական ընտրությունների օր։ Այս մասին տեղեկություն է տարածում Գերմանիայի նախագահի վարչակազմը։

Մինչ այդ Շտայնմայերը հանդիպել է իշխող կոալիցիայի առաջնորդների, ինչպես նաև ընդդիմադիր դաշինքի՝ «Քրիստոնեա-դեմոկրատական ​​միության» առաջնորդի հետ։

Հանդիպումից հետո Շտայնմայերը ողջունել է այն փաստը, որ Բունդեսթագում խորհրդարանական խմբակցությունները համաձայնության են եկել դեկտեմբերի 16-ին՝ որպես կառավարությանը վստահության քվե տալու ժամկետ։

«Նախագահը հստակ հայտարարել է, որ եթե Բունդեսթագն անվստահություն հայտնի դաշնային կանցլերին, նա արագ որոշում կկայացնի խորհրդարանը ցրելու մասին»,- ասված է վարչակազմի հայտարարության մեջ։

Բացի այդ, հայտարարության մեջ նշվում է, որ Շտայնմայերը «2025 թվականի փետրվարի 23-ը համարում է նոր ընտրությունների անցկացման իրատեսական ամսաթիվ»։

«Նախագահը նաև կոչ է արել բոլոր խորհրդարանական խմբերին պատասխանատվությամբ և համատեղ քննարկել, թե որ օրենսդրական առաջարկները դեռ հնարավոր է իրականացնել օրենսդրական այս ժամանակահատվածում՝ Գերմանիայի ներքին և արտաքին անվտանգությունն ապահովելու համար»,- ասվում է վարչակազմի հայտարարության մեջ։

Գերմանիայի կառավարությունում ճգնաժամը սկսվել է այն բանից հետո, երբ նոյեմբերի 6-ին Գերմանիայի կանցլերը որոշել է պաշտոնանկ անել ֆինանսների նախարար, «Ազատ դեմոկրատների» անդամ Քրիստիան Լինդներին։ Սրա պատճառով իշխող կոալիցիան, որի կազմում էին «Սոցիալ-դեմոկրատները», «Կանաչները» և «Ազատ դեմոկրատները», փաստացի փլուզվեց։