Մեր ուղերձը բարձրաձայն և հստակ է, մենք աջակցում ենք վրաց ժողովրդին դեպի ժողովրդավարություն, անկախություն, մարդու իրավունքներ, օրենքի գերակայություն տանող ճանապարհին,- ասել է Ֆինլանդիայի արտաքին գործերի նախարար Էլինա Վալտոնենը Եվրամիության արտաքին գործերի նախարարական նիստի մեկնարկից առաջ։

Վալտոնենի խոսքով՝ սա կլինի Վրաստանում ստեղծված իրավիճակի վերաբերյալ առաջին մանրակրկիտ քննարկումը արտգործնախարարների մակարդակով։

«Մենք աջակցում ենք վրաց ժողովրդին ժողովրդավարության, անկախության, մարդու իրավունքների, օրենքի գերակայության ճանապարհին։ Նրանք նաև խնդրեցին իրենց կառավարությանը բացել դուռը: Միևնույն ժամանակ, երբ իշխանությունը ժողովրդի իրական կամքին հակառակ քայլեր է ձեռնարկել, մենք պետք է միջոցներ մտածենք իշխանությանը դիմակայելու և, միաժամանակ, ժողովրդի հույսը պահելու համար։

Կան միջոցառումներ. Օրինակ, այն, ինչ մենք կարող ենք անել, Վրաստանի բարձրաստիճան պաշտոնյաների համար դժվարացնել Եվրոպա մեկնելն է։ Սա կարող է նշանակել պատժամիջոցներ։ Մենք բաց ենք այն միջոցառումների համար, որոնք հատուկ վերաբերում են Վրաստանի կառավարությանը, այլ ոչ թե վրաց ժողովրդին»,- ասել է Էլինա Վալտոնենը։

Այսօր Լյուքսեմբուրգում տեղի կունենա Եվրոպայի խորհրդի արտաքին գործերի նախարարների նիստը, որը կնախագահի Եվրոպական միության արտաքին գործերի և անվտանգության քաղաքականության գերագույն ներկայացուցիչ Ջոզեֆ Բորելը։ Քննարկվող հարցերի թվում կլինի Վրաստանը։