Եվրամիության առաջնորդները պատրաստվում են Վլադիմիր Պուտինի հետ հնարավոր բանակցություններին. այս մասին տեղեկատվություն է տարածում «Financial Times»-ը։

Ինչպես գրում է հրատարակությունը, Եվրոպական խորհրդի նախագահ Անտոնիու Կոշտան հայտարարել է, որ Եվրամիությունը «պոտենցիալ» ունի Պուտինի հետ բանակցությունների համար, և այդ երկխոսությանը պաշտպանում է Ուկրաինայի նախագահ Վոլոդիմիր Զելենսկին։

«Ես խոսում եմ ԵՄ 27 երկրների առաջնորդների հետ՝ կազմակերպման լավագույն ուղին գտնելու և որոշելու համար, թե ինչ պետք է արդյունավետ քննարկենք Ռուսաստանի հետ, երբ դրա ժամանակը գա»,- հայտարարել է Կոշտան։

Կոշտայի պարզաբանմամբ՝ անցյալ ամիս Կիպրոսում կայացած ԵՄ առաջնորդների գագաթնաժողովում Զելենսկին եվրոպացիներին կոչ է արել «պատրաստ լինել դրական ներդրում ունենալ բանակցություններում»։ Միևնույն ժամանակ, Կոշտան նշել է, որ Մոսկվան այս փուլում արդյունավետ երկխոսության պատրաստակամություն չի ցուցաբերում։

Հրատարակությունը նաև նշում է, որ Զելենսկու գրասենյակը հաստատել է Կոշտայի հետ նշված հարցի քննարկումը։

«Մեզ անհրաժեշտ է ավելի ուժեղ համակարգում եվրոպական մակարդակով»,- հայտարարել է ուկրաինացի բարձրաստիճան պաշտոնյաներից մեկը և նշել, որ հնարավոր է՝ Ռուսաստանի հետ բանակցություններին մասնակցի մեկ առաջնորդ, ով կխոսի եվրոպացիների անունից։

Այնուամենայնիվ, ըստ պարբերականի, 27 երկրների միջև կոնսենսուս չկա այն հարցում, թե ով պետք է ներկայացնի դաշինքը և երբ պետք է սկսվեն նշված բանակցությունները։