«Financial Times»-ի տվյալներով՝ ԱՄՆ Պետդեպարտամենտը մտադիր է ֆինանսավորել Թրամփի «Կրկին մեծացնենք Ամերիկան» շարժման հետ կապված բարեգործական կազմակերպություններն ու վերլուծական կենտրոնները։

Ինչպես գրում է բրիտանական հրատարակությունը, Վաշինգտոնը կփորձի այս կերպ առաջ մղել Թրամփի վարչակազմի դիրքորոշումը: Հոդվածում նշվում է, որ ԱՄՆ Պետդեպարտամենտի բարձրաստիճան պաշտոնյա Սառա Ռոջերսը դեկտեմբերին եղել է Եվրոպայում և հանդիպել է մի քանի կազմակերպությունների ներկայացուցիչների հետ: Նրանց թվում բանակցություններ են վարվել «Reform UK» կուսակցության առաջնորդ Նայջել Ֆարաջի հետ: Սառա Ռոջերսը նաև այցելել է Փարիզ, Հռոմ և Միլան: Financial Times-ը այս կազմակերպությունները, որոնց ներկայացուցիչների հետ ԱՄՆ Պետդեպարտամենտի բարձրաստիճան պաշտոնյան հանդիպել է Եվրոպայում, անվանում է ծայրահեղ աջակողմյան և նշում, որ նրանց տեսակետները համապատասխանում են ԱՄՆ վարչակազմի այն դիրքորոշմանը, որ եվրոպական քաղաքակրթությունը ոչնչացման վտանգի տակ է։

«Նախաձեռնությունը, հավանաբար, շփոթություն կառաջացնի Վաշինգտոնի դաշնակիցների, մասնավորապես՝ կենտրոնամետ ձախ կառավարությունների, ինչպիսին է Մեծ Բրիտանիայի Լեյբորիստական ​​կուսակցությունը, շրջանում, որոնք մտահոգված են, որ ԱՄՆ ֆինանսավորումը կօգտագործվի իրենց քաղաքականությունը խաթարելու համար», – գրում է Financial Times-ը։

Հրապարակման համաձայն, նոր ծրագիրը կշարունակի ԱՄՆ Պետդեպարտամենտի պրակտիկան՝ ֆինանսավորելու Վաշինգտոնի օրակարգը առաջ մղող նախագծերը: Այս նախագծերը կկենտրոնանան Լոնդոնում, Փարիզում, Բեռլինում և Բրյուսելում նախաձեռնությունների վրա։