Էստոնիայի վարչապետ Կայա Կալասի խոսքով՝ Արևմուտքը չպետք է սխալվի՝ գնահատելով Ռուսաստանի հնարավորությունները Ուկրաինայում։

Associated Press-ին տված հարցազրույցում Կալասն ասել է, որ՝ Ռուսաստանն ունի մեծ թվով զորքեր, և նա չի սպառում ռեսուրսները։

«Մենք լուրեր ենք լսում, որ սպառվել են։ Սա այդպես չէ։ Զոհված զինվորներին չեն հաշվում: Չեն հաշվում անհետացած հրետանին։ Հետևաբար, մենք պետք է դրանք ճիշտ գնահատենք երկարաժամկետ հեռանկարում»,- ասել է Կալասը

Այնուամենայնիվ, նա բարձր է գնահատել Արևմուտքի միասնությունը, սակայն նշել է, որ Ռուսաստանի դեմ նոր պատժամիջոցներ սահմանելը գնալով ավելի դժվար է լինելու։

«Սա նորմալ է ժողովրդավարության համար։ Քննարկում ենք, վիճում ու անցնում որոշմանը։ Պուտինի համար առայժմ վատ անակնկալ է, որ մենք միասնական ենք»,- ասել է նա։

Կալասը դեմ է Ռուսաստան-Ուկրաինա խաղաղության համաձայնագրին, եթե Կիևը պետք է տարածքներ զիջի դրա համար։

«Մեզ համար կարևոր է չգործել նույն սխալը, ինչ Ղրիմում, Դոնբասում և Վրաստանում», – ասել է Կալասը։

Ավելի վաղ Financial Times-ին տված հարցազրույցում Էստոնիայի վարչապետը քննադատել էր Էստոնիան պաշտպանելու ՆԱՏՕ-ի ներկայիս ծրագիրը։ Նա ասել է, որ դաշինքի բալթյան երկրների ծրագիրն է՝ թույլ տալ Ռուսաստանին օկուպացնել այդ երկրները 180 օրով, մինչ ՆԱՏՕ-ն կօգնի նրանց։

«Եթե համեմատենք Ուկրաինայի և Բալթյան երկրների տարածքը, ապա դա նշանակում է, որ Ռուսաստանի հարձակման դեպքում սպասվում է, որ այդ երկրները կկործանվեն և կհեռացվեն քարտեզից»,- ասել է Էստոնիայի կառավարության ղեկավարը։

Նման հայտարարություն է արել Կալասը Մադրիդում ՆԱՏՕ-ի գագաթնաժողովից առաջ, որտեղ Էստոնիան, Լիտվան և Լատվիան պահանջում են այդ երկրներում ՆԱՏՕ-ի լրացուցիչ ուժեր մշտական ​​տեղակայել։