Էստոնիան ժամանակավորապես արգելել է թռիչքները իր արևելյան սահմանի վրայով՝ Լենինգրադի մարզում ռուսական ուժերի և ուկրաինական անօդաչու թռչող սարքերի ակտիվության պատճառով, հաղորդել է Էստոնիայի հանրային հեռարձակման ծառայությունը։

Լրատվամիջոցների հաղորդագրությունների համաձայն, տարածքում օդային տարածքը փակ կլինի ամեն օր՝ ժամը 20:00-ից մինչև 07:00-ն՝ հաջորդ մի քանի շաբաթների ընթացքում, մինչև 6000 մետր բարձրության վրա։

«Մենք սահմանափակում ենք միայն ավիացիոն գործունեության մի մասը։ Պարզ ասած, սա նշանակում է, որ նրանք, ովքեր կապ կհաստատեն մեզ հետ և կարդարացնեն իրենց գործողությունները, ինչպես, օրինակ, ոստիկանության և սահմանապահ ծառայության աշխատակիցները երեկ երեկոյան արեցին, երբ անհետ կորած անձի էին փնտրում անօդաչու թռչող սարքի միջոցով, կկարողանան շարունակել աշխատանքը։ Մենք այս միջոցը ձեռնարկեցինք, որպեսզի մոնիթորինգի օպերատորները ավելի քիչ օբյեկտներ ունենան դիտարկելու։ Եվ եթե միջադեպ տեղի ունենա, ավելի հեշտ կլինի ինքնաթիռները դուրս բերել տարածքից», – ասել է Էստոնիայի ռազմաօդային ուժերի հրամանատար Ռիիվո Վալգեն։

Սահմանափակումը, ի թիվս այլ բաների, ազդել է նաև Հելսինկի-Տարտուս չվերթի վրա։

Հիշեցնենք, որ օգոստոսի վերջին Տարտուի շրջանում տեղացի ֆերմերը հայտնաբերել է անօդաչու թռչող սարքի մնացորդներ։ Ոստիկանությունը չի բացառել, որ անօդաչու թռչող սարքը ուկրաինական է եղել։ Անօդաչու թռչող սարքերի հարվածներ են հասցվել Սանկտ Պետերբուրգում, ինչպես նաև Էստոնիայի սահմանի մոտ գտնվող նավթային տերմինալում։