ԱՄՆ պետքարտուղար Էնթոնի Բլինկենը հաստատել է, որ Իրանը բալիստիկ հրթիռներ է մատակարարել Ռուսաստանին՝ Ուկրաինայում օգտագործելու համար, ինչի շնորհիվ Թեհրանի դեմ նոր պատժամիջոցները անխուսափելի են: Այս մասին տեղեկություն է տարածում «Washington Post»-ը։

Լրատվամիջոցների տվյալներով՝ Բլինկենը նշել է, որ այսօր կհայտարարվի նոր պատժամիջոցների մասին։ Պատժամիջոցները, ի թիվս այլոց, ներառում են միջոցներ Իրանի պետական ​​ավիաընկերության դեմ:

«Մենք հրապարակայնորեն զգուշացրել ենք Թեհրանին, մասնավոր զրույցներում զգուշացրել ենք, որ այդ քայլը վտանգավոր էսկալացիա կլինի։ Ռուսաստանն արդեն ստացել է այդ հրթիռների մի քանի խմբաքանակ»,- ասել է Բլինկենը։

Նրա խոսքով, Ռուսաստանը, հավանաբար, մի քանի շաբաթվա ընթացքում կկիրառի այդ զենքը։

Այս շաբաթ Իրանի իշխանության պաշտոնյաները հերքեցին, որ զենք են ուղարկում Ռուսաստան։ Իրանը Ռուսաստանին մատակարարում է մարտական ​​անօդաչու թռչող սարքեր, սակայն մինչև վերջերս ձեռնպահ էր մնում ավելի հզոր զենքեր փոխանցելուց։ Սեպտեմբերի 6-ին «Wall Street Journal»-ը, վկայակոչելով ամերիկացի և եվրոպացի պաշտոնյաներին, հայտնել էր, որ Իրանն արդեն Ռուսաստան է մատակարարել փոքր հեռահարության բալիստիկ հրթիռներ։