ԱՄՆ պետքարտուղար Էնթոնի Բլինկենը Լուսալ պալատում հանդիպել է Կատարի էմիր շեյխ Թամիմ բեն Համադ Ալ-Թանիի հետ։

Բլինկենի այցի հիմնական նպատակը Գազայի և Իսրայելի միջև պատերազմի տարածումը կանխելն էր։ Նա ասաց, որ Մերձավոր Արևելքի երկրները պետք է օգտագործեն իրենց ազդեցությունը՝ կանխելու «բռնության անվերջանալի ցիկլը»:

«Չափազանց շատ պաղեստինցի խաղաղ բնակիչներ չունեն սննդի, ջրի, դեղորայքի, այլ առաջին անհրաժեշտության պարագաների հասանելիություն, հատկապես երեխաները: Մենք շարունակում ենք աշխատել Իսրայելի հետ՝ ամեն ինչ անելու համար՝ հեշտացնելու մարդասիրական օգնության առաքումը Գազայի հատված: Դա կոնֆլիկտ է, որը հեշտությամբ կարող է մետաստազներ տալ և էլ ավելի մեծ անապահովություն, էլ ավելի մեծ տառապանք առաջացնել: Այսպիսով, առաջին իսկ օրվանից, ի թիվս այլ առաջնահերթությունների, մենք ինտենսիվորեն կենտրոնացել ենք հակամարտությունների տարածումը կանխելու վրա, և դա է մեր հիմնական նպատակը։ Նրանց, ովքեր դեռ պատանդ են, նրանց սիրելիներին, նրանց ընտանիքներին, ես ձեզ խոստանում եմ, ԱՄՆ-ը կշարունակի անխոնջ աշխատել ձեզ տուն վերադարձնելու համար»,- ասուլիսում ասել է Բլինկենը։

Մինչ այդ Բլինկենը Հորդանանում էր։ ԱՄՆ պետքարտուղարը նախատեսում է այցելել նաև Իսրայել, Արևմտյան ափ, Արաբական Միացյալ Էմիրություններ, Սաուդյան Արաբիա և Եգիպտոս։