Էմանուել Մակրոնը Փարիզում հյուրընկալել է Մեծ Բրիտանիայի վարչապետ Քիր Սթարմերին
Ֆրանսիայի նախագահ Էմանուել Մակրոնը Փարիզում, Ելիսեյան պալատում հյուրընկալել է Մեծ Բրիտանիայի վարչապետ Քիր Սթարմերին։
Հանդիպման ընթացքում առաջնորդները քննարկել են Ուկրաինայում առկա իրավիճակը, ի թիվս այլ հարցերի, խոսվել է այն մասին, թե ինչպես կկարողանան ապահովել Ուկրաինայի համար առավել բարենպաստ դիրք ձմեռային ժամանակահատվածում։
Այս մասին հայտնում է Մեծ Բրիտանիայի վարչապետի գրասենյակը։
Միաժամանակ կողմերը քննարկել են Մերձավոր Արևելքում առկա իրադարձությունները և մտահոգություն հայտնել Գազայի և Լիբանանի ներկայիս իրավիճակի վերաբերյալ։
Ղեկավարներն անդրադարձել են նաև անօրինական միգրացիայի դեմ պայքարի կարևորությանը։
«Առաջնորդները պայմանավորվել են սերտ հարաբերություններ պահպանել»,- ասվում է Մեծ Բրիտանիայի վարչապետի գրասենյակի հայտարարության մեջ։