Ֆրանսիայի նախագահ Էմանուել Մակրոնը հայտարարել է, որ վաղը և մյուս օրը Բրյուսելում կայանալիք Եվրամիության գագաթնաժողովը կարևոր նշանակություն ունի Ուկրաինայի, Մոլդովայի, Վրաստանի և ամբողջ Արևմտյան Բալկանների համար։ Այս մասին Էմանուել Մակրոնն ասել է Փարիզում այցով գտնվող Սլովենիայի վարչապետ Ռոբերտ Գոլոբի հետ հանդիպման ժամանակ։

«Վաղվա քննարկումը վճռորոշ կլինի Ուկրաինայի, Մոլդովայի, Վրաստանի եւ ողջ Արեւմտյան Բալկանների համար։ Դա վճռորոշ կլինի նաև անդամ երկրների համար։ Այդ իսկ պատճառով մենք միաժամանակ աշխատում ենք մեր միության բարեփոխման վրա»,- ասել է Էմանուել Մակրոնը։

Ֆրանսիայի առաջնորդը նաև նշել է, որ Ֆրանսիան և Սլովակիան պատրաստ են ռազմական, տնտեսական, հումանիտար և դիվանագիտական ​​աջակցություն ցուցաբերել Ուկրաինային այնքան ժամանակ, որքան անհրաժեշտ է, քանի որ «վտանգված են մեր հավաքական անվտանգությունը, ընդհանուր արժեքները և օրենքի վրա հիմնված միջազգային կարգը»։

Սլովենիայի վարչապետ Ռոբերտ Գոլոբն իր հերթին նշել է, որ կարեւոր է Եվրամիության ընդլայնումը Ուկրաինայի, Մոլդովայի եւ Վրաստանի ուղղությամբ։

«Մենք համաձայն ենք, որ Ուկրաինայի, Մոլդովայի և Վրաստանի ուղղությամբ ընդլայնումը կարևոր է։ Այնուամենայնիվ, չպետք է մոռանալ նաև Արևմտյան Բալկանները, որոնք այս եվրոպական ապագայի մաս են կազմում։ Մենք ցանկանում ենք, որ այս ընդլայնումն արդյունավետ լինի։ Մենք պետք է բարեփոխենք ԵՄ-ի ներսում որոշումների ընդունման ընթացակարգը»: