Հեռախոսազրույց է կայացել Ֆրանսիայի նախագահ Էմանուել Մակրոնի և Իսրայելի վարչապետ Բենիամին Նեթանյահուի միջև։ Այս մասին տեղեկություն է տարածում Ելիսեյան պալատը։

Զրույցի ընթացքում Մակրոնը մտահոգություն է հայտնել քաղաքացիական բնակչության մեծ թվով զոհերի և Գազայի խաղաղ բնակչության առջև ծառացած ճնշող հումանիտար արտակարգ իրավիճակի կապակցությամբ։

Ինչպես նշվում է հայտարարության մեջ, Մակրոնը Նեթանյահուի հետ խոսել է Գազայի հատվածում ապրող մարդկանց պաշտպանելու և ժամանակին նրանց անհրաժեշտ օգնություն ցուցաբերելու անհրաժեշտության մասին։

«Անհրաժեշտ է երկարաժամկետ հրադադարի ուղղությամբ աշխատել տարածաշրջանային և միջազգային գործընկերների օգնությամբ։ Կարևոր է, որ Իսրայելը ձեռնարկի բոլոր անհրաժեշտ քայլերը՝ դադարեցնելու որոշ տեղացիների բռնությունները պաղեստինյան ժողովրդի նկատմամբ»,- ասվում է Ելիսեյան պալատի հայտարարության մեջ։

Նեթանյահուն և Մակրոնը խոսել են նաև պատանդների ազատ արձակման մասին, ինչի վերաբերյալ Իսրայելի վարչապետը խնդրել է Ֆրանսիայի նախագահին շարունակել աշխատանքը պատանդների ազատ արձակման հարցով։

Ինչպես պարզ է դառնում Ելիսեյան պալատի հայտարարությունից, Մակրոնն առաջիկա օրերին աշխատելու է Հորդանանի հետ՝ Գազայի հատվածում մարդասիրական գործողություններ իրականացնելու համար։

Մակրոնը նաև ասել է, որ երկու պետությունների լուծումը միակ լուծումն է՝ ապահովելու Իսրայելի երկարաժամկետ անվտանգությունը և բավարարելու պաղեստինցիների օրինական նկրտումները։

Զրույցի ավարտին Մակրոնը եւս մեկ անգամ հաստատել է Ֆրանսիայի աջակցությունը Իսրայելի անվտանգությանը։