ԱՄՆ նախկին նախագահ, Հանրապետական ​​կուսակցության նախագահի թեկնածու Դոնալդ Թրամփին վերամշակված մեղադրական եզրակացություն է ներկայացվել 2020 թվականի ընտրությունների արդյունքները փոխելու փորձի գործով։ Այս մասին գրում է Reuters-ը։

Հատուկ դատախազ Ջեք Սմիթի կողմից՝ Թրամփի դեմ նորացված մեղադրական եզրակացությունը ներառում է նախորդ մեղադրական եզրակացության բոլոր չորս քրեական մեղադրանքները, սակայն դրանցից մի քանիսը մեղմացվել է այն բանից հետո, երբ Գերագույն դատարանը որոշում է կայացրել, որ նախկին նախագահներն ունեն անձեռնմխելիություն:

Reuters-ի փոխանցմամբ՝ նոր մեղադրական եզրակացությունից հանվել է գործի այն մասը, որը վերաբերում է Արդարադատության նախարարության հետ Թրամփի հարաբերություններին։ Այս մասը Գերագույն դատարանը համարել է քրեական հետապնդումից անձեռնմխելի։

Ինչպես գրում է «Reuters»-ը, «Սա հավանաբար դատավարությունը շարունակելու փորձ է»։

Հիշեցնենք, որ ԱՄՆ Գերագույն դատարանը նախկին նախագահին բացարձակ անձեռնմխելիություն է շնորհել ծառայողական գործողությունների համար քրեական հետապնդումից։ Բացարձակ անձեռնմխելիությունը տարածվում է նախագահի պաշտոնավարման ընթացքում կատարած բոլոր պաշտոնական գործողությունների վրա։ Անձեռնմխելիությունը չի տարածվում ոչ պաշտոնական, անձնական գործողությունների վրա, և ստորադաս ատյանները պետք է տարբերակեն նախագահի պաշտոնական և ոչ պաշտոնական գործողությունները: