Դոնալդ Թրամփը Իլոն Մասկին և Վիվեկ Ռամասվամիին նշանակել է կառավարության արդյունավետության նոր դեպարտամենտի ղեկավար
ԱՄՆ նորընտիր նախագահ Դոնալդ Թրամփը Կառավարության արդյունավետության նոր դեպարտամենտի ղեկավարներ է նշանակել ամերիկացի միլիարդատեր Իլոն Մասկին և նախագահի նախկին հանրապետական թեկնածու Վիվեկ Ռամասվամիին։
«Միասին այս երկու մեծ ամերիկացիները կառաջնորդեն իմ վարչակազմի ճանապարհը՝ քանդելու պետական բյուրոկրատիան, կրճատելու ավելորդ կանոնակարգերը, կրճատելու վատնվող ծախսերը և վերակառուցելու դաշնային գերատեսչությունները, որոնք կարևոր են «Ամերիկան առաջին հերթին» գաղափարի համար», – ասել է Թրամփը:
Դոնալդ Թրամփի խոսքով՝ Իլոն Մասկին և Վիվեկ Ռամասվամիին տրվելու է կառավարության ծախսերում ահռելի փոփոխություններ կատարելու լիազորություն։
Դեռևս պարզ չէ, թե նոր գերատեսչությունն ինչ ձևով է լինելու։
«Կառավարության արդյունավետության դեպարտամենտը տրամադրում է խորհրդատվություն և ուղղորդում կառավարությունից դուրս», – ասել է Թրամփը։
Հայտարարության մեջ նշվում է նաև, որ այն «կաշխատի Սպիտակ տան և գործող կառավարման և բյուջեի գրասենյակի հետ՝ լայնածավալ կառուցվածքային բարեփոխումներ իրականացնելու համար»:
Թրամփի խոսքով՝ Իլոն Մասկի և Վիվեկ Ռամասվամիի աշխատանքը պետք է ավարտվի մինչև ԱՄՆ Անկախության օրը՝ 2026 թվականի հուլիսի 4-ը։
Այս որոշմանը սոցցանցում արդեն արձագանքել է ինքը՝ Իլոն Մասկը, ով նշել է, որ գերատեսչությունը ցնցող կլինի համակարգի համար և կազդի բոլորի վրա, ովքեր ներգրավված են պետական միջոցների վատնման մեջ։
Մարդիկ չեն պատկերացնում, թե դա որքանով կփոխի իրավիճակը»,- գրել է Մասկը սոցցանցում։