Դոնալդ Թրամփը հայտարարում է, որ հաստատել է 175 միլիարդ դոլար արժողությամբ «Ոսկե գմբեթ» նախագիծը
ԱՄՆ նախագահ Դոնալդ Թրամփը հայտարարել է, որ հաստատել է «Ոսկե գմբեթ» ծրագրի իրականացումը՝ 175 միլիարդ դոլար արժողությամբ։ Այս մասին Թրամփը հայտնել է Սպիտակ տանը լրագրողների հետ հանդիպման ընթացքում։
«Ոսկե գմբեթը կպաշտպանի մեր հայրենիքը», – նշել է ԱՄՆ նախագահը և հավելել, որ Կանադան նույնպես ցանկություն է հայտնել միանալ այս ծրագրին։
Թրամփի խոսքով՝ պաշտպանական վահանը, որը կարժենա մոտ 175 միլիարդ դոլար, պետք է գործարկվի իր լիազորությունների ավարտից առաջ՝ մինչև 2029 թվականի հունվարը։
«Ռոնալդ Ռեյգանը դա ցանկանում էր տարիներ առաջ, բայց այդ ժամանակ անհրաժեշտ տեխնոլոգիաները գոյություն չունեին», – նշել է Թրամփը։
Թրամփի վարչակազմը հրահանգել է բարձրաստիճան զինվորականներին ապահովել, որ «Ոսկե գմբեթի» հետագա ֆինանսավորումը ներառվի 2026-2030 թվականների նոր բյուջետային ծախսային ծրագրում։