Իսրայելի և Լիբանանի միջև կհայտարարվի 10-օրյա հրադադար։ ԱՄՆ նախագահ Դոնալդ Թրամփը այս մասին գրել է սոցիալական ցանցերում։

Դոնալդ Թրամփը նշել է, որ հիանալի զրույց է ունեցել Լիբանանի նախագահ Ջոզեֆ Աունի և Իսրայելի վարչապետ Բենիամին Նեթանյահուի հետ։

Ըստ Թրամփի՝ երկրների միջև խաղաղության հասնելու համար առաջնորդները համաձայնության են եկել, որ հրադադարի ռեժիմը ուժի մեջ կմտնի Վաշինգտոնի ժամանակով ժամը 17:00-ից։

«Երեքշաբթի օրը մեր երկու երկրների առաջնորդները 34 տարվա ընթացքում առաջին անգամ հանդիպեցին Վաշինգտոնում՝ մեր պետքարտուղար Մարկո Ռուբիոյի հետ։ Ես հանձնարարել եմ փոխնախագահ Ջեյ Դի Վենսին և պետքարտուղար Ռուբիոյին, ինչպես նաև Շտաբների պետերի միացյալ կոմիտեի նախագահ Դեն Ռազին Քեյնին համագործակցել Իսրայելի և Լիբանանի հետ՝ երկարատև խաղաղության հասնելու համար։ Ինձ համար պատիվ է եղել աշխարհում ինը պատերազմ լուծելը, և սա կլինի տասներորդը, այնպես որ եկեք անենք դա», – ասել է Թրամփը։

Բացի այդ, Դոնալդ Թրամփը նշել է, որ Լիբանանի և Իսրայելի առաջնորդներին կհրավիրի Սպիտակ տուն՝ բանակցությունների։ Ինչպես Թրամփը նշել է սոցիալական ցանցերում գրառման մեջ, սա կլինի երկու երկրների ղեկավարների առաջին հանդիպումը 1983 թվականից ի վեր։

«Ես կհրավիրեմ Իսրայելի վարչապետ Բենիամին Նեթանյահուին և Լիբանանի նախագահ Ջոզեֆ Աունին Սպիտակ տուն՝ Իսրայելի և Լիբանանի միջև 1983 թվականից ի վեր առաջին իմաստալից բանակցությունների համար։ Երկու կողմերն էլ ցանկանում են խաղաղություն, և ես հավատում եմ, որ դա տեղի կունենա», – գրել է ԱՄՆ նախագահը սոցիալական ցանցերում։