Անհրաժեշտության դեպքում Միացյալ Նահանգները կարող է լրացուցիչ ոչնչացնել Իրանի ենթակառուցվածքները շատ կարճ ժամանակում՝ մոտ մեկ ժամում,- ասել է ԱՄՆ նախագահ Դոնալդ Թրամփը։

Սպիտակ տանը լրագրողների հարցին, թե ինչ լրացուցիչ ռազմական քայլեր են անհրաժեշտ Իրանի հետ պատերազմն ավարտելու համար, Թրամփը պատասխանել է, որ անհրաժեշտ է շարունակել նույն գործողությունները։

ԱՄՆ նախագահի խոսքով՝ Իրանն արդեն զգալի կորուստներ է կրել։ Նրա խոսքով՝ ԱՄՆ-ն դեռևս որոշակի օբյեկտներ չի թիրախավորել, չնայած դրանք կարող են արագ ոչնչացվել։

«Մենք դեռևս որոշակի օբյեկտների չենք դիպչում, բայց եթե դիպչենք, կարող ենք դա անել այսօր, ըստ էության՝ մեկ ժամվա ընթացքում։ Դրանից հետո նրանք այլևս հնարավորություն չեն ունենա վերականգնել երկիրը», – ասել է Թրամփը։

ԱՄՆ նախագահը նաև նշել է, որ իրականացված ռազմական գործողությունը Իրանին հասցված ամենածանր հարվածներից մեկն է։

«Մենք նրանց ավելի ուժեղ ենք հարվածել, քան պատմության մեջ գրեթե որևէ երկիր երբևէ հարվածվել է, և դա դեռ չի ավարտվել», – ասել է Թրամփը։