ԱՄՆ նախկին նախագահ Դոնալդ Թրամփը հայտարարել է, որ եթե չհաղթի նոյեմբերյան ընտրություններում, «արյան տարափ» կլինի։ Այս մասին նա հայտարարել է Օհայոյում նախընտրական քարոզարշավի շրջանակներում տեղի ունեցած հանրահավաքում ունեցած ելույթի ժամանակ։

Դոնալդ Թրամփը խոսել է Չինաստանի հետ առևտրային պատերազմի սաստկացման մասին։

«Հիմա եթե ինձ չընտրեն, բոլորի մոտ արյան հեղեղ կլինի։ Արյան հեղեղ կլինի երկրի համար»,- ասել է Դոնալդ Թրամփը։

Նա դիմել է նաև Չինաստանի առաջնորդին։

«Եթե դու լսում ես, նախագահ Սի, ես և դու ընկերներ ենք։ Դուք հասկանում եք, թե ինչպես եմ ես գործերը վարում: Դուք հիմա Մեքսիկայում հրեշների մեքենաների գործարաններ եք կառուցում, չեք պատրաստվում վարձել ամերիկացիներին և ուզում եք մեզ մեքենաներ վաճառել։ Ոչ, մենք 100 տոկոս մաքսատուրք ենք սահմանելու յուրաքանչյուր մեքենայի վրա, և դուք չեք կարող վաճառել այդ մեքենաները, եթե ես ընտրվեմ», – ասել է Թրամփը:

ԱՄՆ նախկին հանրապետական ​​նախագահը նաեւ նշել է, որ եթե չհաղթի ընտրություններում, վստահ չէ, որ երբեւէ երկրում եւս մեկ ընտրություններ կլինեն։

Ավելի ուշ Թրամփի քարոզարշավի ներկայացուցիչ Քերոլայն Լևիթը NBC News-ին ասել է, որ Բայդենի քաղաքականությունը «տնտեսական արյունահոսություն» կստեղծի ավտոարդյունաբերության համար։

Ջո Բայդենի նախընտրական շտաբն արձագանքել է Թրամփի հայտարարությանը և հիշեցրել հունվարի 6-ին Կապիտոլիումի գրոհի մասին։

«Ահա թե ով է Դոնալդ Թրամփը. «պարտվողը», որը պարտվում է ավելի քան 7 միլիոն ձայնով և լայն լսարանին դիմելու փոխարեն ավելացնում է քաղաքական բռնության իր սպառնալիքները։ Նա ցանկանում է ևս մեկ հունվարի 6, բայց ամերիկյան ժողովուրդը կպատասխանի ևս մեկ պարտությամբ այս նոյեմբերին, քանի որ մերժում է նրա ծայրահեղականությունը, բռնության հակվածությունը և վրեժխնդրության ծարավը»,- ասել է ներկայիս նախագահի նախընտրական շտաբի խոսնակ Ջեյմս Սինգերը։