Դոնալդ Թրամփ. Մենք վստահ ենք, որ ի վերջո հաղթելու ենք, նախագահը պետք է անձեռնմխելիություն ունենա, ես ոչ մի վատ բան չեմ արել
ԱՄՆ նախկին նախագահ Դոնալդ Թրամփը Վաշինգտոնի դատարանում իր անձեռնմխելիության վերաբերյալ գործը լսելուց հետո ասել է, որ ոչ մի վատ բան չի արել։ Նրա խոսքով՝ նախագահները պետք է անձեռնմխելիություն ունենան։
Ինչպես նշել է Թրամփը, եթե իր գործը շարունակվի, դա հնարավոր կդարձնի նախագահ Ջո Բայդենին քրեական պատասխանատվության ենթարկել, երբ նա հեռանա պաշտոնից:
«Շատ ցավալի է տեղի ունեցածը։ Երբ խոսում են ժողովրդավարության սպառնալիքի մասին, դա ձեր իրական սպառնալիքն է ժողովրդավարությանը: Մենք վստահ ենք, որ ի վերջո հաղթելու ենք։ Նախագահը պետք է անձեռնմխելիություն ունենա: Ես ոչ մի վատ բան չեմ արել»,- ասել է Թրամփը։
ԱՄՆ 45-րդ նախագահ Դոնալդ Թրամփը Վաշինգտոնի դատարանում ներկա է գտնվել այսօրվա դատավարությանը։ Նրա փաստաբանները փորձել են համոզել վերաքննիչ դատարանի երեք դատավորներից կազմված կոլեգիային, որ ԱՄՆ նախկին նախագահը պետք է պաշտպանված լինի այն մեղադրանքներից, որ նա անօրինական կերպով փորձել է բեկանել 2020 թվականի ընտրությունների արդյունքները։ Դատարանը դատաքննության ընթացքում լսեց կողմերի փաստարկները։ Դոնալդ Թրամփը շուտով լքել է դատարանը: