Իրանի զինանոցի ամենաուժեղ զենքը ամերիկյան լրատվամիջոցների կողմից տարածվող «կեղծ լուրերն» են, ասել է Դոնալդ Թրամփը Fox News-ին տված հարցազրույցում։

ԱՄՆ նախագահի խոսքով՝ Իրանը ներկայումս «շատ վատ վիճակում է» և գործնականում չունի ռազմական կարողություններ։

«Նրանք այլևս զինված ուժեր չունեն։ Նրանց մնացել է միայն լավ խոսակցությունը և կեղծ լրատվամիջոցները։ Կեղծ լուրերը, հավանաբար, նրանց ամենամեծ ակտիվն են», – ասել է Թրամփը։

Նրա խոսքով՝ եթե Միացյալ Նահանգները լիովին ոչնչացներ Իրանի ռազմական ենթակառուցվածքը, նավատորմը, ռազմաօդային ուժերը, հակաօդային պաշտպանության համակարգերը և ղեկավարությունը, և Իրանը ստիպված լիներ հանձնվել, որոշ ամերիկյան լրատվամիջոցներ դեռևս կլուսաբանեին իրադարձությունները Իրանի օգտին։

«Եթե Իրանը բարձրացներ սպիտակ դրոշ և ասեր. «Մենք հանձնվում ենք Միացյալ Նահանգների մեծ և հզոր ռազմական ուժին», The New York Times-ը կգրեր, որ Իրանը քաջաբար կռվել է և հաղթել Միացյալ Նահանգներին։ Լուսաբանումը շատ վատ է», – ասել է Թրամփը։

Նա նաև ասել է, որ ամերիկյան լրատվամիջոցների որոշ հատվածներ ռազմական հաջողությունները ներկայացնում են որպես պարտություններ, ինչը, ըստ Թրամփի, վնասում է երկրի շահերին։

«Որպեսզի երկիրը իսկապես մեծ լինի, այն կարիք ունի ազնիվ լրատվամիջոցների։ Իսկ մենք ազնիվ լրատվամիջոցներ չունենք։ Միակ բանը, որ նրանք կարող են անել, ստելն է», – ասել է ԱՄՆ նախագահը։

Հարցին, թե արդյոք Իրանի հետ հակամարտությունը կարող է խնդիրներ առաջացնել հանրապետականների համար միջանկյալ ընտրություններում, Թրամփը պատասխանել է, որ ռազմական որոշումները չպետք է կախված լինեն ընտրությունների օրացույցից։

«Եթե մենք գործեինք այդ տրամաբանությամբ, պետք է սպասեինք մինչև ընտրությունների ավարտը և միայն դրանից հետո գործեինք։ Բայց Իրանը չի կարող միջուկային զենք ունենալ։ Ես անում եմ այն, ինչ կարծում եմ՝ ճիշտ է», – ասել է Թրամփը։