Իրանը չի սիրում մեզ հետ խաղալ, Սպիտակ տանը լրագրողներին ասել է Դոնալդ Թրամփը։

ԱՄՆ նախագահը նաև նշել է, որ ԱՄՆ-ն երկու շաբաթում ոչնչացրել է Իրանի բանակը։

«Իրանը ընդհանրապես չի սիրում մեզ հետ խաղալ։ Դուք դա կտեսնեք ժամանակի ընթացքում։ Իրականում, մենք մոտ երկու շաբաթում ոչնչացրել ենք նրանց բանակը», – ասել է Թրամփը։

Բացի այդ, ԱՄՆ նախագահն ասել է, որ թույլ չի տա, որ Իրանը միջուկային զենք ունենա։

«Իրանը շանս չունի, նրանք երբեք չեն ունեցել։ Նրանք գիտեն դա։ Նրանք ինձ ասում են դա, երբ ես խոսում եմ նրանց հետ, իսկ հետո նրանք դուրս են գալիս հեռուստատեսությամբ և ասում, թե որքան հիանալի են։ Նրանք հիվանդ են, և մենք չենք թողնելու, որ խելագար մարդիկ միջուկային զենք ունենան։ Ես նույնիսկ չեմ ուզում խոսել միջուկային զենքի ուժի մասին, բայց դա տեղի չի ունենալու։ Մենք սարսափելիորեն հաղթել ենք նրանց», – ասել է Թրամփը։

Միևնույն ժամանակ, Դոնալդ Թրամփը հայտարարել է, որ կոչնչացնի Իրանի տնտեսությունը, քանի որ ուզում է հաղթել։

Նա ասել է, որ Իրանն ունի բարձր գնաճ, և երկիրը չի կարող վճարել իր զինվորներին։

«Նրանց արժույթը արժեք չունի։ Նրանց գնաճը, հավանաբար, 150 տոկոս է։ Նրանք չեն վճարում իրենց զինվորներին։ Նրանք չեն կարող վճարել իրենց զինվորներին։ Նրանց փողը արժեք չունի», – ասաց Թրամփը։