Մենք Վրաստանի մտերիմ բարեկամներն ենք և աջակցում ենք ձեր երկրի եվրոպական նկրտումներին,- վրացական պատվիրակության հետ հանդիպումից հետո վրացի լրագրողներին ասաց Հունաստանի խորհրդարանի Եվրոպական հարցերի հանձնաժողովի փոխնախագահ Դիմիտրիոս Կայրիդիսը։

Ինչպես նշել է Դիմիտրիոս Կայրիդիսը, իր գործընկերների հետ հանդիպմանը պայմանավորվել են էլ ավելի սերտ համագործակցության շուրջ։

«Այս երկու ժողովուրդները պատմական կապեր ունեն հին ժամանակներից։ Մենք Վրաստանի մեծ ներկայացուցչություն ունենք Հունաստանում, ինչպես հույներն ունեն սփյուռք Վրաստանում, որն էլ ավելի է մտերմացնում մեզ։ Ուկրաինայում Պուտինի սկսած պատերազմը նոր իրականություն ստեղծեց: Ուկրաինան, ինչպես Վրաստանը, Եվրոպայի մաս է, և սա նոր Եվրոպան է։ Մենք պետք է տեսնենք այս պատմական պահին առաջ շարժվելու այս հնարավորությունը՝ առանց հապաղելու կամ վարանելու: Իմ գործընկերների հետ հանդիպման ժամանակ մենք շատ արդյունավետ քննարկումներ ունեցանք և պայմանավորվեցինք էլ ավելի սերտ համագործակցության մասին»,- ասաց Դիմիտրիոս Կայրիդիսը։