Դեկտեմբերի 16-ին՝ ժամը 12:00-ին, «Էքսպո Ջորջիա»-ի 6-րդ տաղավարում կբացվի գրքի ամանորյա փառատոնը։ Փառատոնը կազմակերպվում է Թբիլիսիի բազմաֆունկցիոնալ գրադարանների միության և Վրաստանի գրահրատարակիչների և տարածողների ասոցիացիայի կողմից և Թբիլիսիի քաղաքապետարանի աջակցությամբ։

Փառատոնը միավորում է ասոցիացիայի կողմից հիմնադրված գրքի ամանորյա փառատոնը և ՅՈՒՆԵՍԿՕ-ի «Թբիլիսի՝ գրքի համաշխարհային մայրաքաղաք» 2021 թվականին հիմնադրված մանկական գրքի փառատոնը։ Ըստ այդմ, փառատոնին կներկայացվեն գրքեր ինչպես երեխաների, այնպես էլ մեծահասակների համար։

Կազմակերպիչների խոսքով, փառատոնին կմասնակցեն Վրաստանում գործող գրեթե բոլոր հրատարակիչները, գրքերի տարածման կազմակերպությունները, որոնք զեղչեր կառաջարկեն հյուրերին։ Հատուկ ուշադրություն է դարձվելու մանկապատանեկան գրականության առկայությանը։

Ամանորյա գրքի փառատոնը ներառում է ինչպես գրքերի ցուցահանդես-վաճառք, այնպես էլ մանկական միջոցառումներ փառատոնի գլխավոր բեմում և մանկական տարածքում, նոր հրատարակությունների շնորհանդես, հանդիպումներ հեղինակների հետ, ամանորյա ձեռագործ աշխատանքների ցուցահանդես-վաճառք և աքսեսուարներ, և տարբեր ժամանցային միջոցառումներ:

Դեկտեմբերի 18-ին՝ ժամը 18:00-ին, փառատոնի շրջանակներում տեղի կունենա «Նակադուլի» մանկական գրական մրցույթի հաղթողների պարգեւատրումը։