Եվրահանձնաժողովի լիովին կողմնակալ լինելը հստակ երևում է այդ զեկույցում, որտեղ դիտավորությամբ բաց են թողել այն կետերը, որոնք ուղղակի մատնանշում են Ուկրաինայի և Մոլդովայի բարձր կոռուպցիոն մակարդակը և այլ բացասական խնդիրները, – այս մասին հայտարարել է Վրաստանի խորհրդարանի ընթացակարգային հարցերի կոմիտեի նախագահ Դավիթ Մաթիկաշվիլին։

Լրագրողները նրան հարց են ուղղել շրջանառվող տեղեկատվության մասին, համաձայն որի՝ Եվրահանձնաժողովը գնահատման փաստաթղթից, որը վերաբերում է ԵՄ ընդլայնման գործընթացին, հեռացրել է Ուկրաինայի և Մոլդովայի վերաբերյալ կոռուպցիայի ու մարդու իրավունքների խնդիրների անդրադարձերը։

Մաթիկաշվիլիի խոսքով՝ դա արվել է նրա համար, որպեսզի վերջնական զեկույցում չարտացոլվեն իրական խնդիրները, ինչը վկայում է ԵՄ-ի սուբյեկտիվ մոտեցման մասին։

«Մենք գիտենք նրանց վերաբերմունքը։ Վրաստանի հանդեպ նրանց դիրքորոշումն ամբողջությամբ բացասական է՝ լիքը «մատից ծծած» խնդիրներով և սուբյեկտիվությամբ։ Այդպես է, երբ ինչ-որ բան իրենց ձեռն է տալիս՝ նկատում են, իսկ ինչն իրենց բացահայտում է, անտեսում են։ Նրանց այս սուբյեկտիվությունը վնասում է ԵՄ-ի հեղինակությանը, և ցավոք, եվրոբյուրոկրատիան շարունակում է նույն ճանապարհով քայլել, ինչը հստակ երևում է զեկույցներում։ Մենք բազմիցս ենք լսել ճնշման և հարկադրանքի փորձեր ԵՄ կառույցների կողմից Վրաստանի նկատմամբ», – հայտարարել է Մաթիկաշվիլին։