Վրաց-գերմանական հարաբերությունները կախված չեն մեկ կոնկրետ պատգամավորից, այս պատգամավորները գալիս ու գնում են, և գործընկերային հարաբերությունները կշարունակվեն, ասել է «Վրացական երազանք»-ի անդամ Դավիթ Մաթիկաշվիլին։

Նրա խոսքով՝ Միխայել Ռոթը ներողություն խնդրելու փոխարեն լուրջ հայտարարություն է արել։

«Շատ ծանր հայտարարություն էր։ Առաջին հայտարարության համար ներողություն խնդրելու փոխարեն նա իրականում յուղ լցրեց կրակի վրա։ Սրանով նա հաստատեց, որ չի սխալվել, դիտավորյալ վիրավորել է այդ բավական նուրբ զգացմունքները, որը վրացիների մոտ հավատ է կոչվում։ Մենք մեր գործընկերներից ակնկալում ենք միայն պարկեշտ և հարգալից հարաբերություններ։ Գործընկերային հարաբերություններում նման բաները լիովին բացառված են։ Վրաստան-Գերմանիա հարաբերությունները կախված չեն մեկ կոնկրետ պատգամավորից։ Այս պատգամավորները գալիս ու գնում են, Վրաստանի ու Գերմանիայի գործընկերությունն ակնհայտորեն կշարունակվի»,- ասել է Մաթիկաշվիլին։

Գերմանիայի խորհրդարանի արտաքին հարաբերությունների հանձնաժողովի նախագահ Միխայել Ռոթը սոցցանցում հայտարարություն է տարածել, որտեղ նշվում է. «Բոլոր կրոններն ու հավատացյալները պետք է համակերպվեն քննադատության հետ, ոմանք դեռ խնդիրներ ունեն դրա հետ, իմ դեպքում դա վրացական ուղղափառությունն է և նորից ու նորից իսլամը»: